Kalyan VIDEO : कल्याणच्या तरुणीला लाथा-बुक्क्यांनी मारलं, माजोरड्या गोकुळ झा या गुंडाला मनसैनिकांनी पकडलं, पोलिसांनी ताब्यात घेतलं
Kalyan Hospital Receptionist Case : गोकुळ झा हा गुन्हेगारी पार्श्वभूमीचा असून त्याच्यावर कल्याणच्या कोळसेवाडी आणि विठ्ठलवाडी पोलीस स्थानकात गुन्हे नोंद आहेत.
ठाणे : कल्याणमध्ये रिसेप्शनिस्ट तरुणीला बेदम मारहाण करणारा आरोपी गोकुळ झा आता पोलिसांच्या तावडीत सापडला आहे. मनसेचे पदाधिकारी योगेश गव्हाणे यांनी त्याला पकडले आणि पोलिसांच्या ताब्यात दिले. रुग्णालयातील रिसेप्शनिस्टने गोकुळ झा नावाच्या तरुणाला थांबण्यास सांगितल्याने त्याने ही मारहाण केली होती. या घटनेनंतर गोकुळ झा फरार झाला होता. आता त्याला पोलिसांनी अटक केली आहे.
या प्रकरणात पोलिसांनी एकूण चार जणांना ताब्यात घेतलं आहे. यातील मुख्य आरोपी गोकुळ झा सह त्याचा भाऊ रणजीत झाला अटक करून बुधवारी कोर्टात हजर करण्यात येणार आहे. मारहाण करणारा रेकॉर्डवरचा हा आरोपी 22 तासांपासून पोलिसांना गुंगारा देत होता. शेवटी मनसेच्या पदाधिकाऱ्यांनीच त्याला पकडलं आणि पोलिसांच्या ताब्यात दिलं.
Kalyan Hospital Receptionist Case : नेमकं काय घडलं?
नांदिवली परिसरातल्या एका खाजगी रुग्णालयात एका रिसेप्शनिस्टला एका गोपाल झा नावाच्या तरुणानं बेदम मारहाण करण्याचा धक्कादायक प्रकार घडला. ही सारी घटना सीसीटीव्ही कॅमेऱ्यानं टिपली आहेत. संबंधित डॉक्टरांकडे काही मेडिकल रिप्रेझेंटेटिव्ह बसले होते. त्यामुळं रिसेप्शनिस्टनं गोपाल झा नावाच्या तरुणाला थांबण्यास सांगितलं. पण तो तरुण जबरदस्तीनं डॉक्टरांच्या केबिनमध्ये जाण्याचा प्रयत्न करत होता. त्यावेळी रिसेप्शनिस्टनं अडवलं असता त्या तरुणानं तिला लाथाबुक्क्यांनी मारहाण केली.
या मारहाणीत तरुणीचे कपडे फाटले आणि तिला जबर दुखापत झाली. या प्रकरणात पीडित तरुणीनं डोंबिवलीच्या मानपाडा पोलीस स्थानकात तक्रार दाखल केली. पण आरोपी गोकुळ झा फरार झाला होता. पोलिसांनी त्याच्या भावाला, रणजीज झा याला अटक केली होती. आता झा हादेखील पोलिसांच्या तावडीत सापडला आहे.
मनसेचे ठाणे जिल्हाध्यक्ष अविनाश जाधव यांनी पीडित तरुणीची तिच्या घरी जाऊन भेट घेतली. पीडित तरुणीच्या रुग्णालयातल्या उपचारांची सारी जबाबदारी मनसेनं घेतल्याचं अविनाश जाधव यांनी सांगितलं. तसेच या प्रकरणातील आरोपी गोकुळ झा याला आम्ही धडा शिकवणार असा इशाराही त्यांनी दिला.
झा गुन्हेगारी पार्श्वभूमीचा
पोलीस रेकॉर्डवर झा याची गुन्हेगार म्हणून नोंद आहे. कल्याणच्या कोळसेवाडी आणि विठ्ठलवाडी पोलीस स्थानकात त्याच्यावर गुन्ह्यांची नोंद आहे. दरम्यान, आरोपी गोकुळ आणि त्याचा भाऊ रणजीत झा याला पोलिसांनी ताब्यात घेतलं आहे. रिसेप्शनिस्ट तरुणी ही मराठी आहे. तर झा हा गुंड परप्रांतिय आहे. त्यामुळे हा वाद आता मराठी-अमराठी या मुद्द्याकडे जात असल्याचं चित्र आहे.
ही बातमी वाचा:
महत्त्वाच्या बातम्या
