अजब चोराची गजब कहाणी! डोक्यावर टक्कल; पण ओळख लपवण्यासाठी केसांचा विग लावायचा

Jalna Crime News : या अजब चोराची गजब कहाणी ऐकून पोलिसांना देखील धक्का बसला आहे.

Jalna Crime News

Jalna Crime News : चोरी करताना आपली ओळख पटू नये म्हणून अनेकदा चोरटे तोंडाला रुमाल बांधतात किंवा अनेक प्रयोग करून स्वतःची ओळख लपवत असतात. पण जालना (Jalna) शहरात एका चोराने त्यापुढे जात भन्नाट जुगाड लावत आपली ओळख पोलिसांपासून लपवण्याचा प्रयत्न केला. त्यामुळे अनेकदा सीसीटीव्हीत कैद होऊन देखील तो पोलिसांना सापडत नव्हता. मात्र, पोलिसांनी अखेर त्याला बेड्या ठोकल्या असून, त्याच्या अजब चोराची गजब कहाणी ऐकून पोलिसांना देखील धक्का बसला आहे. 

टक्कल असताना रात्री चोरी करायची, मात्र ओळख पटू नये म्हणून दिवसा डोक्यावर बनावट केसांचे विग लावून हा चोर फिरायचा. त्यामुळे अनेकदा सीसीटीव्हीत कैद झाल्यानंतरही या चोराची खरी ओळख पटत नव्हती. अंबड शहरासह पैठण, पाचोड येथे विविध ठिकाणी चोरी करणाऱ्या या चोराने पोलिसांसमोर एकप्रकारे आव्हान उभे केले होते. शेवटी या चोराला अंबड पोलिसांनी रविवारी (30 जुलै)  रोजी बेड्या ठोकल्या आहेत. त्यानंतर त्याचा भंडाफोड झाला आहे. मुस्तफा अब्दुल सय्यद (वय 25 , रा. चंदनझिरा, जालना) असे संशयित चोरट्याचे नाव आहे. पोलिसांनी त्याच्याकडून चोरीच्या मुद्देमालासह चोरी करण्यासाठी वापरण्यात येणारे साहित्य जप्त केले आहे.

अंबड शहरात दोन महिन्यांपूर्वी चार ठिकाणी चोरीच्या घटना घडल्याने खळबळ उडाली होती. अंबड शहराच्या मध्यवस्ती भागात असलेले बागडे ज्वेलर्स या सराफा दुकानाची मागील भिंत फोडून चोरट्यांनी गॅस कटरच्या मदतीने तिजोरी फोडण्याचा प्रयत्न केला होता. सोबतच याच भागातील आशीर्वाद मेडीकल, साई मेन्स वेअर येथेही चोरी झाली होती. पोलिसांकडून या प्रकरणातील आरोपीचा शोध घेतला जात होता. विशेष म्हणजे हा आरोपी सीसीटीव्हीत कैद झाला होता. मात्र, यात टक्कल असलेला संशयित आरोपी दिसत असल्याने पोलिसांकडून त्याचा शोध घेतला जात होता. 

असा अडकला पोलिसांच्या जाळ्यात...

या चोऱ्यांचा तपास करत असताना पाचोड रोडवरील एका पेट्रोलपंपाजवळ एक संशयित चोरीची दुचाकी विक्रीसाठी येणार असल्याची माहिती अंबड पोलिसांना मिळाली होती. या माहितीच्या आधारे पथकाने सापळा लावला. संशयित एका विनाक्रमांकाच्या दुचाकीवरून आल्यानंतर पोलिसांनी त्यास थांबण्याचा इशारा केला. मात्र, तो पाचोडच्या दिशेने पळून जाऊ लागला. पोलिसांनी त्यास पाठलाग करून पकडले. सुरुवातीला त्याने उडवाउडवीचे उत्तरे दिली. मात्र, त्यास अंबड ठाण्यात आणून कसून चौकशी केली असता, त्याने अंबड शहरात ठिकठिकाणी चोरी केल्याची कबुली दिली. तसेच पाचोड व पैठण येथे आटोपार्टच्या दुकानात चोरी करून एक दुचाकी व स्कुटी चोरल्याची कबुली दिली. पोलिसांनी त्याच्याकडून चोरीचा लॅपटॉप, रेडीमेड कपडे, दोन दुचाकी, गॅस टॉकी, कटर आदी साहित्य जप्त केले आहे. तर टक्कल असलेला मुस्तफा दिवसा डोक्यावर बनावट केसांचे विग लावून फिरायचा. त्यामुळे पोलिसांना त्याची ओळख पटविणे शक्य होत नव्हते.

इतर महत्वाच्या बातम्या: