Share Market : शेअर बाजारात घसरण, सेन्सेक्स 500 अंकांनी कोसळला, गुंतवणूकदारांचे 3 लाख कोटी बुडाले
Share Market: भारतीय शेअर बाजारात आज मोठी घसरण पाहायला मिळाली. सेन्सेक्स 559 अंकांच्या घसरणीसह बंद झाला. तर निफ्टीमध्ये देखील 147 अंकांची घसरण झाली.
मुंबई : भारतीय शेअर बाजारात आज (12 फेब्रुवारी) मोठी घसरण पाहायला मिळाली. गुंतवणूकदारांनी नफा वसूल करण्याचं धोरण स्वीकारल्यानं बाजारात घसरण पाहायला मिळाली. सेन्सेक्स 559 अंकांच्या घसरणीसह 83674.92 अंकांवर बंद झाला. तर, निफ्टी 50 निर्देशांक देखील 147 अंकांच्या घसरणीसह 25807 वर बंद झाला. सर्वच क्षेत्रात जोरदार विक्री झाल्यानं बाजारावर परिणाम दिसून आला. बीएसई 150 मिडकॅप निर्देशांक 0.46 टक्क्यांनी घसरला. तर, बीएसई 250 स्मॉल कॅप निर्देशांक 0.86 टक्क्यांनी घसरला.
Share Market Update : गुंतवणूकदारांचे 3 लाख कोटी बुडाले
शेअर बाजारातील घसरणीमुळं बीएसईवर लिस्ट असलेल्या कंपन्यांचं बाजारमूल्य कमी झालं. बुधवारी बीएसईवरील कंपन्यांचं बाजारमूल्य 475 लाख कोटी रुपये होतं, आज ते तीन लाख कोटींनी कमी होऊन 472 लाख कोटींवर आलं. म्हणजेच गुंतवणूकदारांचं 3 लाख कोटी रुपयांचं नुकसान झालं.
भारतीय शेअर बाजारातील घसरणीचं प्रमुख कारण आयटी स्टॉक्सची जोरदार विक्री हे आहे. एआय क्षेत्रातील अपडेटस मुळं आयटी स्टॉक्सला धक्का बसला. याशिवाय डॉलर निर्देशांक देखील मजबूत झाल्यानं त्याचा नकारात्मक परिणाम दिसून आला.
अमेरिकन शेअर बाजारात आयटी शेअरमध्ये झालेल्या घसरणीमुळं भारतीय शेअर बाजारात देखील आयटी कंपन्यांचे स्टॉक्स घसरले. अमेरिकेत व्याज दरातील कपातीची शक्यता कमी असल्यानं गुंतवणूकदार नफा वसूल करत आहेत.
निफ्टी 50 निर्देशांकावर सर्वाधिक वाढ बजाज फायनान्स, श्रीराम फायनान्स, आयशर मोटर्सच्या शेअरमध्ये दिसून आली. तर, निफ्टी 50 वर सर्वाधिक फटका टेक महिंद्रा, इन्फोसिस,टीसीएस,एचसीएल टेक्नोलॉजीज, विप्रोच्या शेअरला बसला. निफ्टी 50 मधील 30 स्टॉक्स घसरणीमुळं बंद झाले.
कच्च्या तेलाच्या दरात वाढ झाल्यानं शेअर बाजारावर त्याचा परिणाम झाला.आंतरराष्ट्रायी बाजारात गुरुवारी ब्रेंट क्रूड ऑईलचा दर 0.46 टक्क्यांनी वाढून 49.72 डॉलर प्रति बॅरल झाला आहे. अमेरिका आणि इराण यांच्यातील वाढत्या तणावामुळं तेलाच्या दरात वाढ झाली. भारतासारख्या तेल आयातदार देशाला क्रूड ऑईलच्या दरातील वाढ परवडणारी नसते.
जागतिक शेअर बाजारांमधून देखील कोणताही आधार भारतीय शेअर बाजाराला मिळाला नाही. आशियाई बाजार कमजोर राहिले. तर, हाँगकाँगचा हैंग सेंग निर्देशांक कमजोर राहिला. याशिवाय अमेरिकन शेअर बाजार बुधवारी घसरणीसह बंद झाले होते.
(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)
महत्त्वाच्या बातम्या
