Share Market Opening Bell: शेअर बाजारात आपटीबार; प्री-ओपनिंग सत्रात सेन्सेक्स 1100 अंकानी कोसळला

Share Market Opening Bell : शेअर बाजारात मोठी घसरण झाली. प्री-ओपनिंग सत्रात सेन्सेक्स 1100 अंकांनी घसरला. बाजारातील व्यवहार सुरू झाल्यानंतर काही प्रमाणात बाजार सावरला.

Share Market Opening Bell: शेअर बाजारात आपटीबार; प्री-ओपनिंग सत्रात सेन्सेक्स 1100 अंकानी कोसळला

Share Market Opening Bell : अमेरिकन शेअर बाजारात झालेल्या पडझडीचा परिणाम भारतीय शेअर बाजारावर दिसून आला. प्री-ओपनिंगमध्ये (Share Market Pre-Opening Session) सेन्सेक्समध्ये (Sensex Fall) एक हजार अंकांची घसरण दिसून आली. तर, निफ्टी (Nifty) तब्बल 298 अंकांची मोठी घसरण दिसून आली. अमेरिकेत पुन्हा महागाई वाढल्याने (US Inflation Data) अमेरिकन शेअर बाजारात घसरण झाली होती. महागाई वाढल्याने फेडरल रिझर्व्हकडून व्याज दर वाढण्याची शक्यता आहे. शेअर बाजारात प्री-ओपनिंग सत्रात घसरण झाल्यानंतर बाजार सावरू लागला. 

मुंबई शेअर बाजाराचा निर्देशांक सेन्सेक्स 1,153.96 अंकांनी म्हणजे जवळपास 1.91 टक्क्यांच्या घसरणीसह 59,417 अंकांवर खुला झाला. तर, राष्ट्रीय शेअर बाजाराचा निर्देशांक निफ्टी 298.90 अंकांनी म्हणजे 1.65 टक्क्यांच्या घसरणीसह 17,771 अंकावर खुला झाला. प्री-ओपनिंगनंतर बाजारातील व्यवहार सुरू झाल्यानंतर बाजार पुन्हा सावरू लागला. सकाळी 9.30 वाजण्याच्या सुमारास सेन्सेक्स 560 अंकांच्या घसरणीसह 60,011.05 अंकांवर व्यवहार करत होता. तर, निफ्टी 159 अंकांच्या घसरणीसह 17,910.80 अंकांवर व्यवहार करत होता. 

सेन्सेक्समधील 30 कंपन्यांपैकी 5 कंपन्यांच्या शेअरमध्ये तेजी दिसून आली. तर, उर्वरित 25 कंपन्यांच्या शेअर दरात घसरण नोंदवण्यात आली. निफ्टी निर्देशांकातील 50 पैकी 10 कंपन्यांच्या शेअर दरात वाढ दिसून आली. तर, 40 कंपन्यांच्या शेअरमध्ये घसरण झाली. 

सेन्सेक्समध्ये एनटीपीसीच्या शेअर दरात 2 टक्क्यांची तेजी दिसत आहे. तर, एशियन पेंट्स 0.67 टक्के, नेस्ले 0.36 टक्के आणि एसबीआयमध्ये 0.26 टक्क्यांची तेजी दिसत आहे. त्याशिवाय, पॉवरग्रीडमध्ये 0.18 टक्के, आयटीसीमध्ये 0.15 टक्के, इंडसइंड बँकेत 012 टक्क्यांची तेजी दिसून येत आहे. 

अमेरिकन बाजारात मोठी पडझड

अमेरिकन शेअर बाजारात मागील दोन वर्षातील सर्वात मोठी पडझड दिसून आली. अमेरिकन शेअर बाजारात झालेल्या या पडझडीचा परिणाम आशियाई आणि भारतीय शेअर बाजारावर दिसून येण्याची शक्यता आहे. अमेरिकन शेअर बाजारातील तिन्ही प्रमुख निर्देशांकात जून 2020 नंतरची मोठी घसरण दिसून आली. अमेरिकेत महागाईने पुन्हा डोके वर काढल्याने बाजारात घसरण झाल्याचे म्हटले जात आहे.  ऑगस्ट महिन्यात अमेरिकेतील महागाईचा दर 8.3 टक्के इतका नोंदवण्यात आला. अमेरिकेतील महागाईचा दर हा अपेक्षेपेक्षा अधिक दिसून आल्याने बाजारात पडझड झाल्याचे दिसून आले. महागाईमुळे फेडरल रिझर्व्हकडून व्याज दरात वाढ होण्याची शक्यता आहे. 

SGX Nifty मध्ये 1.5 टक्क्यांची घसरण

अमेरिकन शेअर बाजारात झालेल्या पडझडीचा परिणाम SGX Nifty सह आशियाई शेअर बाजारावर दिसून आला. सकाळी SGX Nifty निर्देशांक 258 अंकांच्या घसरणीसह 17807 अंकांवर व्यवहार करत होता. सिंगापूरचा बाजारात 1.25 टक्के, जपानच्या शेअर बाजारात 2.09 टक्के, हाँगकाँगमध्ये 0.18 टक्के, कोरियन शेअर बाजारात 1.70 टक्क्यांची घसरण दिसून आली.