Gold Return : इक्विटी शेअर, बाँडला मागं टाकलं, सोन्यातील गुंतवणुकीवर 2025 मध्ये 27 टक्के परतावा, सोन्याचे दर आणखी किती वाढणार?
Gold Price: सोन्यात गुंतवणूक करणं गुंतवणूकदारांना फायदेशीर ठरलं आहे. 2025 मध्ये सोन्याच्या दरात मोठी वाढ झाली आहे.
Gold Price This Year: सोन्यातील गुंतवणूक दरवेळी गुंतवणूकदारांसाठी फायदेशीर ठरली आहे. अमेरिकेचे अध्यक्ष डोनाल्ड ट्रम्प यांनी विविध देशांवर टॅरिफ लादल्यानं हे वर्ष चर्चेत राहिलं. जगात विविध देशांमध्ये सुरु असलेल्या युद्धांमुळं गेल्या दोन वर्षांमध्ये सोन्याचे दर 20 टक्क्यांनी वाढले आहेत. 2025 मध्ये सोन्यातील गुंतवणुकीवर 27 टक्के परतावा मिळाला आहे. गुंतवणुकीचा विचार केला असता इक्विटी शेअर, बाँड पेक्षा अधिक परतावा सोन्यातील गुंतवणुकीतून मिळाला आहे.
सोन्यातील गुंतवणुकीनं शेअरला मागं टाकलं
सोन्यातील गुंतवणुकीवर 27 टक्के परतावा 2025 या वर्षातील पहिल्या 7 ते आठ महिन्यात गुंतवणूकदारांना मिळाला आहे. सोन्याच्या तुलनेत इक्विटी आणि बाँड का मागं राहिले असा प्रश्न निर्माण झाला आहे. इक्विटीचा विचार केला असता जागतिक राजकारणातील घडामोडी आणि ट्रम्प यांच्याकडून लादण्यात येत असलेल्या टॅरिफमुळं केवळ 5 ते 10 टक्के परतावा इक्विटीतील गुंतवणुकीतून मिळाला आहे. भारतात बीएसई सेन्सेक्स आणि निफ्टी 50 नं 60 टक्के परतावा दिला आहे. जागतिक बाजारात एस अँड पी 500 नं 8 टक्के, नॅस्डॅक 10 टक्के, डाऊ 30 नं 5 टक्के परतावा दिला आहे.
डेब्ट मार्केटचा विचार केला असता यातून फारसा परतावा गुंतवणूकदारांना मिळालेला नाही. एस अँड पी यू.एस. एग्रीगेट बाँड इंडेक्सनं (YTD) केवळ 5 टक्के परतावा दिला आहे. तर, डेट-मीडियम ड्यूरेशन कॅटेगरीचा सरासरी रिटर्न (YTD) 6 टक्क्यांहून कमी राहिला आहे.
गेल्या 10 वर्षात सोन्यातील गुंतवणुकीमुळं 11 टक्के रिटर्न दिला आहे. 1111 डॉलर प्रति औंस वरुन वाढून 3350 डॉलर प्रति औंसवर सोन्याचे दर गेल्या 10 वर्षात पोहोचले आहेत. सोन्याच्या दरात जागतिक भू राजनैतिक संघर्ष आणि घडामोडींमुळं वाढ झाली. केंद्रीय बँकेकडून सोन्याची रेकॉर्ड ब्रेक खरेदी, युद्धजन्य स्थिती, अमेरिकेचे अध्यक्ष डोनाल्ड ट्रम्प यांच्याकडून लादण्यात येत असलेले टॅरिफ यामुळं सोन्याचे दर वाढत आहेत. या सर्व कारणांमुळं सोन्याच्या दरात ऐतिहासिक तेजी पाहायला मिळत आहे. गुंतवणूकदारांच्या मनात अनिश्चितता असल्यानं सोने दर वाढत आहेत.त्यामुळं या वर्षी सोने दरानं इक्विटी आणि बाँडपेक्षा अधिक रिटर्न दिले आहेत.
जागतिक गोल्ड काऊन्सिलच्या डेटानुसार केंद्रीय बँकांच्या सोने खरेदीत या वर्षी घसरण झाली आहे. पहिल्या तिमाहीत 244 टन सोनं खरेदी करण्यात आलं तर, दुसऱ्या तिमाहीत 166 टन सोने खरेदी झाली. केंद्रीय बँकांनी पुढील 12 महिन्यात केंद्रीय बँकांनी त्यांच्याकडील सोने 43 टक्क्यांनी वाढवण्याचा निर्णय घेतला आहे.
सोन्याचे दर किती रुपयांपर्यंत वाढणार
सध्या 10 ग्रॅम सोन्याचा दर 100450 रुपये आहे. 23 जुलै रोजी पहिल्यांदा सोन्याच्या दरानं 1 लाख रुपयांचा टप्पा पार केला होता. आंतरराष्ट्रीय बाजारात सोन्याचे दर 3375 डॉलर प्रति औंसवर पोहोचले आहेत. गेल्या 12 महिन्यांचा विचार केला असता 35 टक्के रिटर्न मिळाला आहे. आता सोन्याचे पुढील दर अमेरिकन अर्थव्यवस्था आणि जागतिक व्यापाराची स्थिती यावर अवलंबून असतील. आर्थिक आणि राजनैतिक अनिश्चितता कायम राहिल्यास सोन्याचे दर वाढत राहतील.
महत्त्वाच्या बातम्या
