EPFO अन् ESIC सदस्यांना ATM मधून पीएफचे पैसे कधीपासून काढता येणार? नवी अपडेट समोर 

EPFO : कर्मचारी भविष्य निधी संघटना आणि कर्मचारी राज्य विमा निगमच्या सदस्यांना लवकरच त्यांच्या क्लेमची रक्कम ई-वॉलेट्सच्या माध्यमातून मिळण्याची शक्यता आहे.

EPFO Update

Source : एबीपी माझा ग्राफिक्स टीम

नवी दिल्ली : कर्मचारी भविष्य निधी संघटना आणि कर्मचारी राज्य विमा निगमच्या  सदस्यांना त्यांच्या क्लेमची रक्कम सहजपणे मिळावी यासाठी नवी सुविधा उपलब्ध करुन दिली जाणार आहे. श्रम आणि रोजगार मंत्रालयाच्या सचिव सुमिता डावरा यांनी बुधवारी यासंदर्भातील माहिती दिली. ईपीएफओमधील पीएफची रक्कम एटीम कार्डद्वारे काढण्यासंदर्भात विचार केला जात आहे. एटीएम आणि ई-वॉलेट ची प्रक्रिया  मार्च 2025 पर्यंत लागू केली जाईल, अशी माहिती आहे. 

सुमिता डावरा यांच्या माहितीनुसार ईपीएफओ पीएफ खात्यातून रक्कम काढण्याची प्रक्रिया सोपी करण्याबाबत विचार करत आहे. ऑटो सेटलमेंट प्रकरणात रक्कम खातेदाराच्या बँक खात्यात जाईल, यानंतर कर्मचारी एटीम कार्डवरुन देखील रक्कम काढ शकतो. याशिवाय ईपीएफओकडून असा प्रयत्न केला जात आहे की क्लेमची रक्कम ई-वॉलेटमध्ये देखील पाठवता येईल. या सुविधांची अंमबजावणी करण्यासंदर्भात नवी व्यवस्था देखील तयार केली जात आहे. 

सुमिता  डावरा यांनी यासंदर्भात म्हटलं की नवी व्यवस्था लागू करण्यासाठी बँक आणि इतर वित्तीय संस्थांसोबत चर्चा सुरु केली आहे. लवकरच एक व्यावहारिक योजना लागू करण्यात येईल. रिझर्व्ह बँक ऑफ इंडियासोबत देखील या संदर्भात संपर्क सुरु  असल्याचं म्हटलं. ईपीएफओशी संबंधित एका अधिकाऱ्याच्या माहितीनुसार ही प्रक्रिया केवळ रक्कम काढण्यासंदर्भात सोपी करण्यात येत आहे. पीएफ खात्यातून रक्कम काढण्यासंदर्भातील नियम बदलले जाणार नाहीत. सध्या लागू असलेल्या नियमानुसार कर्मचारी एका वेळी जितकी  रक्कम काढण्याची सुविधा उपलब्ध आहे ती सुरु राहील. 

ईपीएफओ पेन्शनच्या उच्च वेतन पर्यायांची चौकशी आणि वेतन विवरण अपलोड करण्याची तारीख 31 जानेवारीपर्यंत वाढण्यात आली आहे. ईपीएफओच्या माहितानुसार 3.1 लाख अर्जदारांना मुदतवाढीचा फायदा होणार आहे. 

देशभरात सध्या पीएफ खातेदारांची संख्या 2023 च्या तुलनेत वाढली आहे. ईपीएफओमध्ये जवळपास 7 कोटी 47 लाख खातेदार 2024 मध्ये योगदान देत आहेत. या खातेदारांकडून त्यांच्या मूळ वेतनाच्या 12.5 टक्के रक्कम पीएफ खात्यात जमा केली जाते. तर, कंपनीकडून देखील 12.5 टक्के रक्कम पीएफ खात्यात जमा केली जाते. त्यापैकी काही रक्कम पीएफमध्ये तर काही रक्कम पेन्शन खात्यात जमा केली जाते. 

पीएफ खातेदारांना दरवर्षी व्याज दिलं जातं. पीएफ खातेदारांना साधारणपणे 8 ते 8.50 टक्क्यांच्या दरम्यान व्याज मिळतंय. आगामी वर्षांमध्ये अधिक व्याज देण्यासाठी ईपीएफओकडून इटीएफमध्ये गुंतवणूक वाढवण्याचा प्रयत्न केला जाऊ शकतो.  सध्या इटीएफमध्ये ईपीएफओकडून 10 टक्के रक्कम  गुंतवली जाते.

इतर बातम्या :