Hanuman Jayanti 2024 : जगातील सर्वात उंच 105 फुटांची हनुमंत मूर्ती पाहिली? बुलढाण्यातील या मूर्तीला हनुमान जयंतीनिमित्त महाजलाभिषेक, पाहा फोटो

Hanuman Jayanti 2024 : यंदा बुलढाण्यात विविध कार्यक्रमांनी हनुमान जयंती साजरी होणार आहे. बुलढाण्यातील नांदुरा येथे 105 फूट उंच विशालकाय बजरंग बलीची मूर्ती आहे. हनुमान जन्मोत्सवानिमित्त जगातील सर्वात उंच आणि महाकाय हनुमंताला महाजलाभिषेक होणार आहे.

Buldhana Biggest Hanuman Temple

Buldhana : असं म्हटलं जातं की प्रत्येक गावात काही वैशिष्ट्य असलं की त्या गावाला त्याची ओळख मिळते... काहीसं असच बुलढाण्यातील नांदुरा या गावाबाबत घडलं आहे... नांदुरा गाव तसं छोटं... पण मध्य रेल्वे व राष्ट्रीय महामार्ग क्र. 6 येथून जाण्यापालीकडे या गावाची ओळख नव्हती....पण आता नांदुरा या गावाला 2001 पासून नवीन ओळख मिळाली आहे....आणि ती म्हणजे "हनुमान नगरी" म्हणून... ती म्हणजे या गावाजवळ असलेली जगातील सर्वात उंच आणि विशालकाय अशी 105 फूट उंच हनुमानाची मूर्ती....!

मूर्ती स्थापन्याचा रोचक इतिहास

जवळपास पंचवीस वर्षाआधी नांदुरा येथील एक कांदा उत्पादक शेतकरी आपला कांदा नागपूर येथील बाजारपेठेत विक्रीसाठी घेऊन गेला असताना त्याठिकाणी एका आंध्रप्रदेशातील व्यापाराला या शेतकऱ्याचा कांद्याचा दर्जा आवडला आणि त्याने या शेतकऱ्याला कांदा कुठला अशी विचारपूस केली असता त्याने नांदुरा अस सांगितलं. आंध्रप्रदेशातील या शिवराम मोहनराव या व्यापाऱ्याने नंतर नांदुरा येथे भेट देऊन याठिकाणी व्यापारानिमित्त स्थायिक होण्याचं ठरवलं. मोहनराव हे बालाजींचे भक्त असल्याने त्यांनी याठिकाणी 1999 साली बालाजी ट्रस्ट स्थापन केलं.

हनुमान हे बालाजीचे भक्त असल्याने त्यांनी नांदुरा येथे हनुमानाची भव्य आणि विशालकाय मूर्ती स्थापन करण्याचा निर्णय 2000 साली घेतला. त्याकाळी अशी मूर्ती तयार करण्यासाठी जवळपास 50 ते 60 लाख रुपये खर्च येणार होता, त्यासाठी त्यांनी आंध्रप्रदेशातुन मूर्तिकार आणून ही मूर्ती घडवली. या मूर्तीच्या बाजूलाच बालाजीचे भव्य आणि आकर्षक असं मंदिरही बांधण्यात आलं आहे.

105 फूट उंच मूर्तीची वैशिष्ट्ये

आंध्रप्रदेशातील पेद्दापुरम येथील जॉन बाबू या मुर्तीकाराने ही मूर्ती तब्बल 210 दिवस अथक प्रयत्नातून साकारली आहे. ही 105 फूट उंच हनुमंताची मूर्ती अतिशय सुंदर आणि सुबक आहे. मूर्तीच्या कपाळावर सुवर्ण लेपन केलेलं टिळक लावलेलं आहे. मूर्तीमध्ये 1 इंच ते 12 इंच साईझचे जवळपास एक हजार कृत्रिम डायमंड लावलेले आहेत. मूर्तीचे डोळे 27 इंच बाय 24 इंच या आकाराचे असून मानवाचे कृत्रिम डोळे बनवणाऱ्या कंपनीत ते बनवले गेले आहेत.

मूर्तीला दररोज जलाभिषेक करण्याची व्यवस्था करण्यात आली आहे तसेच मूर्तीला साडे तीन क्विंटलचा हार रिमोटद्वारे चढवण्याची सुद्धा व्यवस्था करण्यात आली आहे, हनुमान हे बालाजींचे भक्त असल्याने शेजारीच कोट्यवधी रुपये खर्च करून बालाजी मंदिर बनविण्यात आलंय. सुंदर असं हे मंदिर आहे...तर या ठिकाणी एक नेत्र रुग्णालय सुद्धा चालवण्यात येत आहे.

जागतिक पातळीवर मूर्तीची नोंद

एकंदरीत जगातील या उंच व विशालकाय अशा हनुमंताच्या 105 फूट उंच मूर्तीची "गिनीज बुक ऑफ लिम्का "ने सुद्धा 2003 साली दखल घेतली आहे. दररोज याठिकाणी हजारो भाविक दर्शनासाठी येतात. वर्षभर या ठिकाणी विविध धार्मिक कार्यक्रम होत असतात. आज हनुमान जन्मोत्सव असल्याने लाखो भक्त याठिकाणी सकाळ पासूनच पूजा अर्चा करण्यासाठी आले आहेत. या वर्षी राज्याच्या मुख्यमंत्र्यांना सुद्धा हनुमान जन्मोत्सवासाठी आमंत्रित करण्यात आलं आहे.

हेही वाचा: