Maharashtra Dairy Farmers : प्रभात (लॅक्टीस) दूध कंपनीची मालमत्ता सील करा; दूध उत्पादक शेतकरी संघर्ष समितीची मागणी

Maharashtra Dairy Farmers : शेतकऱ्यांच्या दुधाचे पैसे थकवल्यानंतर आता प्रभात (लॅक्टीस) कंपनी पोबारा करण्याची शक्यता दावा करत कंपनीची अकोले तालुक्यातील मालमत्ता सील करण्याची मागणी किसान सभेने केली आहे.

Maharashtra Dairy Farmers : प्रभात (लॅक्टीस) दूध कंपनीची मालमत्ता सील करा; दूध उत्पादक शेतकरी संघर्ष समितीची मागणी

Maharashtra Dairy Farmers : प्रभातची (लॅक्टीस) अकोले (Akole) तालुक्यातील मालमत्ता सील करण्याची मागणी अखिल भारतीय किसान सभा (All India Kisan Sabha) आणि  दूध उत्पादक शेतकरी संघर्ष समितीने केली आहे. प्रभात (लॉक्टीलीस) दूध कंपनी अकोले तालुक्यातील दूध संकलन बंद करणार असल्याचे कंपनीचे कर्मचारी शेतकऱ्यांना सांगत आहेत. काही संकलन केंद्रांना तशा नोटिसाही पाठविण्यात आल्या आहेत. कंपनीकडून तालुक्यातील शेतकऱ्यांचे मोठ्या प्रमाणात पैसे येणे बाकी आहे. शेतकऱ्यांचे हे पैसे न देताच कंपनीला पोबारा करता येऊ नये यासाठी पोलीसांनी व सरकारच्या दुग्धविकास विभागाने हस्तक्षेप करून अकोले तालुक्यातील कंपनीची  मालमत्ता सील करावी अशी मागणी किसान सभा व दूध उत्पादक शेतकरी संघर्ष समितीने केली आहे.

शेतकऱ्यांच्या देणीबाबत मागील काही दिवसांपासून दूध उत्पादक शेतकरी संघर्ष समिती आक्रमक झाली आहे. प्रभात कंपनीकडून दिवाळीपूर्वी अकोले तालुक्यात 85 हजार लिटर दूध संकलन करण्यात चे होते.  मात्र रीबिटबाबतचे 70 टक्के दूध कंपनीलाच घालण्याची सक्ती करणारे शेतकरी विरोधी धोरण व दूध वजन आणि गुणवत्ता मापनाबाबत संशयास्पद व्यवहारामुळे शेतकऱ्यांनी कंपनीकडे पाठ फिरवली असल्याचे समितीने म्हटले. कंपनीचे तालुक्यातील संकलन प्रतिदिन 85 हजार लिटरवरून 35 हजार लिटरवर खाली आले आहे. आपला व्यवहार सुधारून शेतकऱ्यांचा विश्वास पुन्हा मिळविण्याऐवजी कंपनीने पोबारा करण्याचे धोरण स्वीकारलेले दिसत असल्याचा आरोप किसान सभा व दूध उत्पादक शेतकरी संघर्ष समितीचे नेते डॉ. अजित नवले यांनी केला आहे. 

प्रभात कंपनीने रिबीटसाठी 70 टक्के दूध कंपनीलाच घालण्याची अट लावून तालुक्यातील हजारो शेतकऱ्यांना कोट्यावधी रुपयांचे रीबिट नाकारले आहे. कंपनीने शेतकऱ्यांना 31 मार्च 2021 पासून 30 सप्टेंबर  2022 या कालावधीतील रीबिटचा हिशोब द्यावा व येणे बाकी निघत असेल तर ते शेतकऱ्यांना  आदा करावे अशी साधी मागणी शेतकऱ्यांनी केली असल्याचे डॉ. नवले यांनी सांगितले. 

कंपनीने संकलन केंद्रावर बसविलेले मिल्कोमिटर इतरांच्या तुलनेत कमी रीडिंग दाखवत आहेत. परिणामी शेतकऱ्यांची लुट होत आहे. कंपनीने हे मिल्कोमिटर तपासून घ्यावेत व सदोष मिल्कोमिटर बदलावेत अशी शेतकऱ्यांची मागणी असल्याचे समितीचे नेते सदाशिव साबळे यांनी सांगितले.

रीबिट देण्यासाठी कंपनीने 70 दिवसांची अट लावल्यामुळे शेतकऱ्यांचे निवड स्वातंत्र्य धोक्यात आले आहे. मागील दिवसांचे रिबीट बुडेल या भीतीपोटी शेतकऱ्यांना  तोंड दाबून बुक्क्यांचा मार सहन करायला लावला जातो आहे. प्रभातसह इतरही काही कंपन्यांनी शेतकऱ्यांना वेठीस धरण्याची ही नवी पद्धत दूध व्यवसायात आणली असल्याचा आरोप त्यांनी केला. सर्वच कंपन्यांनी ही जुल्मी पद्धत बंद करावी अशी शेतकऱ्यांची मागणी आहे.

कंपनीकडून शेतकऱ्यांना मोठ्या प्रमाणात पैसे येणे बाकी आहेत. दिवाळीपासून आजपर्यंतचे रीबिट येणे बाकी आहे. अशा पार्श्वभूमीवर अकोले तालुक्यातील कंपनीची मालमत्ता पोलीसांनी सील करावी व  शेतकऱ्यांची संपूर्ण बाकी वसूल होईपर्यंत ही मालमत्ता ताब्यात ठेवावी, अशी मागणी दूध उत्पादक शेतकरी संघर्ष समिती  व किसान सभेने केली आहे. शेतकऱ्यांनी  मागण्यांचे निवेदन संघटनेने दुग्ध विकास मंत्री राधाकृष्ण विखे, तसेच दुग्धआयुक्त, दुग्धविकास अधिकारी व संबंधित यंत्रणेला पाठविले असल्याची माहिती डॉ. अजित नवले यांनी दिली. 

इतर महत्त्वाच्या बातम्या: