Thane Poll War: 'संजय राऊत जे बोलतात त्याचं नेहमी उलट होतं', BJP चे Sanjay Kelkar यांचा टोला

ठाणे महानगरपालिका निवडणुकीच्या पार्श्वभूमीवर राजकीय वातावरण तापले आहे. भाजप आमदार संजय केळकर यांनी शिवसेना (UBT) नेते संजय राऊत यांच्यावर निशाणा साधला आहे. 'संजय राऊत जे बोलतात त्याचं नेमकं उलट होत असतं आणि त्याच्यामुळे त्यांनी असं बोलत राहावं', अशा शब्दात केळकर यांनी राऊत यांना शुभेच्छा दिल्या आहेत. ठाकरेंची शिवसेना आणि मनसे एकत्र आल्यास भाजपच्या 'सत्तर पार'च्या घोषणेला उत्तर म्हणून 'पंच्चाहत्तर पार' जाऊ, या राऊत यांच्या विधानावर केळकर प्रतिक्रिया देत होते. 'छप्पा छप्पा भाजपा' ही आमची जुनी आणि देशव्यापी घोषणा असल्याचेही ते म्हणाले. निवडणुकीत आम्ही कोणालाही कमी लेखत नाही, पण जनतेचे आशीर्वाद आणि केलेल्या कामाच्या जोरावर आम्ही जिंकून येऊ, असा विश्वास संजय केळकर यांनी व्यक्त केला आहे.