Rane vs Rane: 'निवडणुकीनंतर एकत्र येऊ', मंत्री नितेश राणेंच्या वक्तव्याने महायुतीत नवा ट्विस्ट

सिंधुदुर्ग जिल्हा परिषद निवडणुकीच्या पार्श्वभूमीवर कोकणातील राजकारण तापले असून, राणे बंधूंमध्येच सामना रंगण्याची चिन्हे आहेत. भाजप नेते आणि मंत्री नितेश राणे यांनी, 'वेगवेगळे लढून निवडणुकीनंतर सत्ता स्थापन करण्यासाठी एकत्र येऊ', असे सूचक वक्तव्य केले आहे. या वक्तव्यामुळे महायुतीमधील मतभेद पुन्हा एकदा समोर आले आहेत. दुसरीकडे, शिवसेनेचे आमदार निलेश राणे यांनी जिल्हा परिषद निवडणूक शिवसेनाच जिंकणार असल्याचा विश्वास व्यक्त केला आहे. निलेश राणे यांनी सिंधुदुर्ग जिल्हा परिषदेवर शिवसेनेचा भगवा फडकवणारच, असा दावा केला आहे, तर नितेश राणे यांनी स्वबळावर लढण्याचे संकेत दिले आहेत. या राजकीय घडामोडींमुळे सिंधुदुर्ग जिल्ह्यात, महायुतीचा भाग असूनही शिवसेना आणि भाजप स्थानिक पातळीवर एकमेकांविरोधात उभे ठाकणार असल्याचे स्पष्ट झाले आहे.