Maharashtra Politics : सर्वपक्षीय शिष्टमंडळ निवडणूक आयोगाला भेटणार, राऊतांचे विरोधकांनाही निमंत्रण

शिवसेना (UBT) नेते संजय राऊत यांनी जाहीर केले आहे की, १४ ऑक्टोबर रोजी एक सर्वपक्षीय शिष्टमंडळ राज्याचे मुख्य निवडणूक अधिकारी एस. चोक्कलिंगम यांची भेट घेणार आहे. 'मुख्यमंत्री नाहीत, तर पक्षाचे नेते म्हणून देवेंद्र फडणवीस यांनीही या बैठकीला यावे', असे म्हणत राऊत यांनी थेट मुख्यमंत्र्यांनाच निमंत्रण दिले आहे. या शिष्टमंडळात शरद पवार, उद्धव ठाकरे, काँग्रेस प्रदेशाध्यक्ष हर्षवर्धन सकपाळ आणि मनसे अध्यक्ष राज ठाकरे यांचा समावेश असेल. विशेष म्हणजे, राऊत यांनी त्यांचे राजकीय विरोधक असलेल्या अजित पवार गट आणि शिंदे गटालाही पत्र पाठवून या भेटीसाठी बोलावले आहे. आगामी स्थानिक स्वराज्य संस्थांच्या निवडणुका पारदर्शक वातावरणात व्हाव्यात, हा या भेटीमागील उद्देश असल्याचे राऊत यांनी म्हटले आहे. मात्र, ज्या निवडणूक आयोगाला राऊत आणि त्यांचे सहकारी पूर्वी 'चुना आयोग' म्हणून हिणवत होते, त्याच आयोगाकडे ते आता चर्चेसाठी जात असल्याने राजकीय वर्तुळात आश्चर्य व्यक्त होत आहे.