NCP Pune : रुपाली विरुद्ध रुपाली वाद पेटला, अजितदादांची डोकेदुखी वाढणार Special Report

पुण्यातील राष्ट्रवादी काँग्रेसमध्ये (NCP) रुपाली चाकणकर (Rupali Chakankar) आणि रुपाली ठोंबरे पाटील (Rupali Thombre Patil) यांच्यातील संघर्ष पुन्हा एकदा उफाळून आला आहे. एका व्हायरल व्हिडिओमुळे सुरू झालेल्या या वादामुळे पक्षाचे अध्यक्ष अजित पवार (Ajit Pawar) यांची डोकेदुखी वाढली आहे. 'चाकणकर मोठ्या पदावर असूनही महिलांना धमक्या देतात आणि त्यांच्या स्पर्धकांविरोधात व्हिडिओ तयार करायला लावतात,' असा थेट आरोप रुपाली ठोंबरे यांनी केला आहे. माधवी खंडाळकर नावाच्या महिलेने आधी ठोंबरे यांच्यावर मारहाणीचा आरोप करणारा व्हिडिओ पोस्ट केला, मात्र नंतर तो कौटुंबिक वाद असल्याचे सांगत घुमजाव केला. यानंतर ठोंबरे यांच्या बहिणीसह चार जणांविरुद्ध खडक पोलीस ठाण्यात गुन्हा दाखल झाला, ज्यामुळे संतप्त झालेल्या ठोंबरेंनी पोलीस ठाण्यातच पक्षाचा राजीनामा देण्याची धमकी दिली. फलटणच्या डॉक्टर आत्महत्या प्रकरणावरून झालेल्या वादाची किनारही या नव्या संघर्षाला असल्याचे बोलले जात आहे.