GST-Swadeshi Reforms | प्रत्येक कुटुंबाची वर्षाला अडीच लाखांची बचत, 'स्वदेशी'चा नवा नारा

पंतप्रधान नरेंद्र मोदींनी देशवासियांना संबोधित करताना 'गर्व से कहो स्वदेशी' हा कानमंत्र दिला. प्रत्येक नागरिकाने स्वदेशी वस्तू वापरण्याचा आणि दुकानदारांनी स्वदेशी वस्तू विकण्याचा आग्रह त्यांनी केला. देशाला समृद्ध आणि स्वावलंबी बनवण्यासाठी प्रत्येक घर आणि दुकान स्वदेशी वस्तूंनी भरले पाहिजे असे मोदींनी सांगितले. "देश की स्वतंत्रता को, जैसे स्वदेशी के मंत्र से ताकत मिली, वैसे ही देश की समृद्धि को भी स्वदेशी के मंत्र से ही शक्ति मिलेगी," असे ते म्हणाले. अमेरिकेने भारतावर अव्वाच्या सव्वा टारिफ लावण्याच्या पार्श्वभूमीवर हा स्वदेशीचा नारा महत्त्वाचा मानला जात आहे. उद्यापासून सुरू होणाऱ्या नवरात्रीच्या परवापासून देशात 'GST बचत उत्सव' सुरू होईल असेही मोदींनी जाहीर केले. घर निर्मिती, वाहन खरेदी आणि पर्यटन स्वस्त होणार असल्याचे त्यांनी सांगितले. GST चे आत्ताचे पाच टक्के आणि अठरा टक्के हे दोनच स्लॅब राहतील. बारा टक्के स्लॅबमधील नव्व्याण्णव टक्के वस्तू आता पाच टक्क्यांच्या स्लॅबमध्ये आल्या आहेत. आयकर आणि GST कपातीमुळे प्रत्येक कुटुंबाची वर्षाला अडीच लाखांची बचत होईल असेही मोदींनी नमूद केले. आयकरातून मध्यम वर्गाला आणि GST कपातीमधून नवमध्यम वर्गाला फायदा होणार आहे.