Mumbai Rail Protest: CSMT त मोटरमनला डांबले, स्टेशन मास्तरांचीही अडवणूक; आंदोलक कर्मचारी अडचणीत

मुंबईतील CSMT स्थानकात रेल्वे कर्मचाऱ्यांनी केलेल्या आंदोलनामुळे मध्य रेल्वेची वाहतूक विस्कळीत झाली. सेंट्रल रेल मजदूर संघाचे अध्यक्ष प्रवीण वाजपेयी यांच्या नेतृत्वाखाली हे आंदोलन झाले. आंदोलकांनी मोटरमनला लॉबीमध्ये डांबून ठेवल्याने आणि स्टेशन मास्तरांची वाट अडवल्याने लोकल ट्रेन सेवा ठप्प झाली, ज्यामुळे प्रवाशांचे प्रचंड हाल झाले. ‘आम्ही ६६ प्लॅटफॉर्मवर धरणे देण्याचा निर्णय घेतला नव्हता, पण अचानक आंदोलक तिथे पोहोचले. प्रवाशांचा अपघात दुर्दैवी आहे, पण त्याचा आमच्याशी काहीही संबंध नाही,’ असे सेंट्रल रेल्वे मजदूर संघाचे अध्यक्ष प्रवीण वाजपेयी यांनी म्हटले आहे. या आंदोलनामुळे मुंबईची जीवनवाहिनी असलेल्या लोकल सेवेवर गंभीर परिणाम झाला. अखेरीस, आरपीएफ पोलिसांनी हस्तक्षेप करून स्टेशन मास्तरांची सुटका केली आणि अडवलेली वाट मोकळी करून दिली. या संपूर्ण प्रकरणाची आता चौकशी होणार असून, आंदोलक रेल्वे कर्मचारी अडचणीत येण्याची शक्यता आहे.