Farmers' Protest: शेतकरी नेते आक्रमक, सरकारसोबतची बैठक निष्फळ ठरल्यास रेलरोकोचा इशारा

शेतकरी नेते बच्चू कडू (Bacchu Kadu), राजू शेट्टी (Raju Shetti) आणि महादेव जानकर (Mahadev Jankar) यांच्या नेतृत्वाखालील शिष्टमंडळ मुख्यमंत्री देवेंद्र फडणवीस (Devendra Fadnavis) यांच्यासोबत मुंबईत बैठक घेत आहे. 'आजच्या बैठकीमध्ये तोडगा निघाला नाही तर उद्यापासनं रेलरोको केलं जाईल,' असा स्पष्ट इशारा आंदोलक नेत्यांनी दिला आहे. संध्याकाळी सात वाजता सह्याद्री अतिथीगृहावर होणाऱ्या या बैठकीत शेतकऱ्यांच्या सरसकट कर्जमाफीच्या मागणीवर प्रामुख्याने चर्चा होणार आहे. याव्यतिरिक्त, पिकांचा हमीभाव, पंजाबच्या धर्तीवर शेतमाल खरेदी केंद्र, दिव्यांगांचे प्रश्न, मेंढपाळांच्या समस्या आणि ग्रामपंचायत कर्मचाऱ्यांच्या मागण्या यांसारख्या इतर महत्त्वाच्या विषयांवरही सरकारसोबत वाटाघाटी केल्या जाणार आहेत. या बैठकीत तोडगा न निघाल्यास आंदोलन अधिक तीव्र करण्याचा निर्धार नेत्यांनी व्यक्त केल्याने संपूर्ण राज्याचे लक्ष या बैठकीच्या निर्णयाकडे लागले आहे.