Ashadhi Ekadashi | Wadala च्या प्रतिपंढरपुरात उत्साह, एकनाथ शिंदेंच्या हस्ते विठ्ठलाची पूजा

मुंबईतील वडाळा परिसरात असलेल्या विठ्ठल मंदिराला प्रति पंढरपूर म्हणून ओळखले जाते. आषाढी एकादशीनिमित्त आज वडाळ्यातील या मंदिरात मोठा उत्साह दिसून आला. हे मंदिर चारशे वर्षांपूर्वी उभारण्यात आलेले एक पुरातन मंदिर आहे. आषाढी एकादशीच्या निमित्ताने सकाळपासूनच भाविकांनी विठ्ठलाच्या दर्शनासाठी मोठ्या प्रमाणात गर्दी केली होती. यावेळी उपमुख्यमंत्री एकनाथ शिंदेंच्या हस्ते विठ्ठलाची पूजा संपन्न झाली. पूजेनंतर त्यांनी महाराष्ट्रातील जनतेला आषाढी एकादशीच्या शुभेच्छा दिल्या. तीन दिवसांपूर्वी पंढरपूरलाही जाऊन आल्याचे त्यांनी सांगितले आणि तिथेही पांडुरंगाच्या भक्तांमध्ये प्रचंड उत्साह पाहिल्याचे नमूद केले. तसेच उत्साह वडाळ्याच्या प्रति पंढरपुरातही दिसत असल्याचे त्यांनी म्हटले. आषाढीनिमित्त लाखो पांडुरंगाचे भक्त दर्शनासाठी येत असल्याचे त्यांनी सांगितले. "शेतकरी, वारकरी, लाडकी बहीण, लाडके भाऊ सगळ्याच महाराष्ट्रातल्या तमाम जनतेच्या आयुष्यामध्ये सुखाचे, समाधानाचे आनंदाचे दिवस येऊ दे" अशी पांडुरंगाच्या चरणी प्रार्थना केल्याचे त्यांनी नमूद केले.