मुंबई : अमित ठाकरेंना राजकारणात आणा, मनसे नेत्यांची मागणी

मनसे अध्यक्ष राज ठाकरेंचे सुपुत्र अमित ठाकरे यांना सक्रीय राजकारणात आणण्याची मागणी जोर धरु लागली आहे. मनसेच्या नेत्यांच्या बैठकीत अमित ठाकरेंना राजकारणात आणण्याची मागणी करण्यात आली आहे.

आज मनसेच्या नेत्यांच्या आणि सरचिटणीसांच्या बैठकीत बाळा नांदगावकर आणि संदीप देशपांडेनी अमित ठाकरेंना राजकारणात आणण्याची मागणी केली. तसंच मराठीच्या मुद्यावर सविस्तर चर्चा या बैठकीत करण्यात आली.

आपल्यातच मराठीचा मुद्दा रूजलाय का असा सवालही बाळा नांदगावकरांनी विचारला आहे. तसंच नाशिकमधील कामांचं आपण मार्केटिंग करु शकलो नाही त्यामुळे कार्यकर्त्यांनी राज ठाकरेंच्या आदेशाची वाट न पाहता पक्षासाठी काम करण्याबद्दलही बैठकीत चर्चा करण्यात आली.

मनसेची नवी स्ट्रॅटेजी बनवून पुन्हा कमबॅक करण्यावरही बैठकीमध्ये चर्चा करण्यात आली.