Zero Hour Full : सचिन अहिर शिवसेनेत,शिंदेंचा ठाकरेंना धक्का, झीरो अवरमध्ये सविस्तर चर्चा

महाराष्ट्राच्या राजकारण सध्या इतकं आयाराम गयाराममय झालंय की कधी काय होईल.. कोण कोणत्या पक्षात जाईल याचा अंदाज लावणं.. हे भल्या भल्या राजकीय पंडितांनाही जमत नाहीय. मंडळी, खरं तर सध्या पावसाचाही अचूक अंदाज लावणं विज्ञान आणि तंत्रज्ञानानं शक्य केलंय. पण, राजकारणात कधी काय होईल, याचा अंदाज लावणं खरंच कठीण नाही, तर अशक्य झालंय. 
आता हेच पाहा ना.. राज्य विधिमंडळांच्या पावसाळी अधिवेशनाच्या सहाव्या दिवसांचं कामकाज आज सुरु झालं.. सभागृहाच्या पायऱ्यांवर विरोधकांचं आंदोलन सुरु झालं.. सरकारविरोधी घोषणा सुरु होत्या.. विधिमंडळांच्या पायऱ्यांजवळ पत्रकारांचीही लगबग होती. हे आंदोलन संपण्याच्या आतच ठाकरेंच्या शिवसेनेचे आमदार अंबादास दानवे माध्यमांसमोर आले. त्यांनी थेट विधान परिषदेच्या उपसभापतीपदाच्या निवडणुकीत महाविकास आघाडीकडून जगन्नाथ अभ्यंकर यांना उमेदवारी देण्यात आल्याचं सांगितलं.. त्यामुळं पत्रकारांनी जगन्नाथ उर्फ ज. मो.अभ्यंकरांची माहिती शोधायला सुरुवात केली.. तोच विधीमंडळ सचिवांच्या केबिनमधून एक व्हिडिओ समोर आला.. 
त्या व्हिडिओनं महाराष्ट्राच्या राजकारणात मोठी खळबळ उडवली..
त्या व्हिडिओत कोण-कोण होतं.. तर पहिले होते मुख्यमंत्री देवेंद्र फडणवीस, त्यांच्या बाजूला दोन्ही उपमख्यमंत्री एकनाथ शिंदे आणि सुनेत्रा पवार... त्यांच्या जोडीला महायुतीच्या नेत्याची फौज... पण, त्यामध्ये एक चेहरा महायुतीचा नव्हता.. तो होता.. ठाकरेंच्या शिवसेनेचे आमदार सचिन अहिर यांचा..
मंडळी, एकदम बरोबर ओळखलंत.. त्याच आमदार सचिन अहिर यांनी विधान परिषदेच्या उपसभापतीपदासाठी चक्क महायुतीकडून आपला उमेदवारी अर्ज दाखल केला आणि ऑपरेशन टायगर थ्री पॉईंट ओ... अधिकृतरित्या सुरु झाल्याच्या चर्चेला उधाण आलं.
मंडळी, या घडामोडीनं मविआत फक्त ठाकरेंचंच टेन्शन वाढलंय असं नाही.. तर पवारांच्या राष्ट्रवादीतही आज झालेल्या चर्चा लक्षात घेता तिथंही काही ना काही तरी नक्कीच शिजतंय याचा अंदाज येतो. एकूणच काय मंडळी. विधीमंडळात राक्षसी बहुमत असूनही महायुतीत सुरु असलेलं इनकमिंग... आणि त्यामुळं कमकुवत होणारा विरोधी पक्ष.. पाहून राजकीय जाणकार सशक्त लोकशाहीबद्दल चिंता व्यक करतायत. 
एकंदरीत ठाकरेंच्या शिवसेनेसह शरद पवारांच्या राष्ट्रवादीत नेमकं काय सुरु आहे.. याची चर्चा आणि विश्लेषण करणार आहोतच.. पण, त्याआधी पाहूयात आजचा पहिला प्रश्न..