Maharashtra Kesari : महाराष्ट्र केसरीची मानाची गदा कोण उंचावणार? अंतिम लढतीत कोल्हापूर, मुंबई आमने सामने

Maharashtra Kesari Kusti Competition : दोन वर्षानंतर महाराष्ट्र केसरी स्पर्धा रंगली असून आता या मानाच्या स्पर्धेचा अंतिम सामना रंगणार आहे.

Maharashtra Kesari

Maharashtra Kesari Kusti Competition : महाराष्ट्राच्या मातीतील प्रतिष्ठेची महाराष्ट्र केसरी (Maharashtra Kesri) स्पर्धा तब्बल दोन वर्षानंतर पार पडत आहे. कोरोना महामारीच्या (Corona Virus) संकटामुळे गेले दोन वर्ष जणू काही सारं विश्वच थांबलं होतं. त्यात ही स्पर्धाही पार पडली नव्हती. मात्र आता निर्बंधमुक्तीनंतर जनजीवन रुळावर येत असून ही स्पर्धाही साताऱ्यात उत्साहात पार पडत आहे. यंदाच्या 'महाराष्ट्र केसरी' (Maharashtra Kesari Kusti Championship) स्पर्धेला सुरुवात झाली आणि बघता बघता किताबाच्या कुस्तीची वेळही जवळ आली आहे. आज म्हणजेच 9 एप्रिलला महाराष्ट्र केसरी किताबाची कुस्ती मॅटवर रंगणार असून,  या कुस्तीत खुल्या म्हणजे ८६ ते १२५ किलो वजनी गटाच्या माती आणि गादी विभागाच्या अंतिम फेरीत विजयी झालेले दोन पैलवान आमनेसामने आहेत. विशेष म्हणजे दोघेही कोल्हापूरच्या तालमीत तयार झाले आहेत. पण यातील एक पृथ्वीराज पाटील कोल्हापूरचं तर दुसरा विशाल बनकर मुंबईचं प्रतिनिधित्व करत आहे.  

अटीतटीची लढत

आजच्या सामन्यात आमनेसामने असणारे पृथ्वीराज आणि विशाल यांच्यात पृथ्वीराजला मॅटवरच्या कुस्त्यांचा तसंच आंतरराष्ट्रीय सामन्यांचा अधिक अनुभव आहे. त्यामुळे त्याचं पारडं काहीसं जड आहे. पण दुसरीकडे विशाल उर्फ प्रकाश कोल्हापूरच्या गंगावेस तालमीत तयार झाला आहे. त्याचे काका तानाजी बनकर यांनीही 1987 साली महाराष्ट्र केसरी किताब पटकावला होता. त्यामुळे आजची लढत चुरशीची होणार यात शंका नाही.

कोल्हापूरचा 21 वर्षांचा दुष्काळ संपणार का? 

पृथ्वीराज पाटील हा मूळचा पन्हाळा तालुक्यातल्या देवठाणेचा पैलवान आहे. कोल्हापुरात जालिंदरआबा मुंडे यांच्या शाहू कुस्ती केंद्रात तो लहानाचा मोठा झाला. सध्या पुण्याच्या आर्मी स्पोर्टस इन्स्टिट्यूटमध्ये ट्रेनिंग सुरु असून अमर निंबाळकर आणि राम पवार त्याचे प्रशिक्षक आहेत. दरम्यान आज पृथ्वीराज जिंकल्यास 21 वर्षानंतर कोल्हापूरला महाराष्ट्र केसरीचा मान मिळणार आहे.

हे ही वाचा- 

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha