Russia Ukraine War : रशिया-युक्रेनमधील वादाचा फटका फुटबॉलला, चॅम्पियन्स लीग फुटबॉल स्पर्धेत महत्त्वाचा बदल

Russia Ukraine War : रशिया आणि युक्रेन यांच्यातील वादाचे पडसाद जगभरात उमटत असून विविध क्षेत्रांवर याचा परिणाम होत आहे.

UEFA_1

Russia Ukraine War : रशियाने युक्रेनवर हल्ला केला असून आज युद्धाचा दुसरा दिवस आहे. या युद्धाचे पडसाद जगभरात उमटत आहे. विविध देशांच्या अर्थव्यवस्थेला याचा फटका बसत असताना आता क्रिडा क्षेत्रालाही याचा फटका बसला आहे. प्रसिद्ध फुटबॉल स्पर्धा चॅम्पियन्स लीगच्या अंतिम सामन्याचं ठिकाण या युद्धामुळे बदलण्यात आलं आहे. आधी या स्पर्धेचा अंतिम सामना रशियातील प्रसिद्ध फुटबॉल स्टेडियम सेंट पीटर्सबर्ग येथे होणार होता. पण आता हे ठिकाण बदलून पॅरिस करण्यात आलं आहे. 

28 मे रोजी या स्पर्धेचा अंतिम सामना रशियाच्या सेंट पीटर्सबर्ग येथे खेळवण्यात येणार होता. पण रशियाचे अध्यक्ष पुतीन यांनी युक्रेनविरुद्ध युद्ध पुकारल्यानंतर आता चॅम्पियन्स लीग समितीने हे ठिकाण बदलून पॅरिस केलं आहे. आता हा सामना फ्रान्समधील सेंट डेनीस या मैदानात खेळवण्यात येणार आहे. UEFA ने एक निवेदन जारी करून त्यात म्हटले आहे की, "UEFA कार्यकारी समितीने 2021-22 UEFA पुरुष चॅम्पियन्स लीगचा अंतिम सामना रशियाच्या सेंट पीटर्सबर्ग येथून फ्रान्सच्या सेंट डेनिस येथे हलवण्याचा निर्णय घेतला आहे. हा सामना नियोजित वेळेनुसार शनिवारी 28 मे रोजी 9 वाजता खेळला जाईल.  

UEFA ने मानले फ्रान्सचे आभार

दरम्यान UEFA कार्यकारी समितीने फ्रेंच रिपब्लिकचे अध्यक्ष इमॅन्युएल मॅक्रॉन यांनी अशा तणावपूर्ण परिस्थितीत सर्वात मानाच्या फुटबॉल स्पर्धेबाबत दाखवलेलं वैयक्तिक समर्थन याबाबत धन्यवाद व्यक्त केलं आहे.   

महत्वाच्या बातम्या

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोड पाहा लाईव्ह - ABP Majha