IPL Media Rights : आयपीएलचे टीव्ही मीडिया राईट्स डिजनी स्टारकडे; तर डिजीटल हक्क वायकॉम 18 कडे, बीसीसीआयलाही बक्कळ फायदा

IPL Media Rights Auction 2022 : आयपीएल स्पर्धेच्या मीडिया आणि डिजीटल राइट्ससाठी बऱ्याच मोठ्या कंपन्यांनी बोली लावली होती, ज्यात अखेर डिजनी स्टार आणि वायकॉम 18 ने बाजी मारली आहे.

IPL Media Rights

IPL Media Rights: क्रिकेटचा महासंग्राम असणाऱ्या इंडियन प्रीमियर लीगचे (IPL) सामने कोणत्या कंपनीला प्रसारित करण्याचे हक्क मिळणार यासाठी देखील लिलाव पार पडला. यामध्ये टीव्ही मीडिया राईट्सच्या शर्यतीत डिजनी स्टारने (Disney Star) तर डिजीटल हक्कांसाठी वायकॉम 18 ने (Viacom18) बाजी मारली आहे. भारतीय क्रिकेट कंट्रोल बोर्ड अर्थात बीसीसीआयने (BCCI) आयपीएलच्या पुढील पाच वर्षांसाठीचे मीडिया राइट्ससाठी लिलाव प्रक्रिया (IPL Media Rights 2023-27  Auction) घेतली. त्यामुळे आयपीएलचे सामने हे स्टार स्पोर्ट्सवरच दिसणार असून ऑनलाईन सामने मात्र वूट (Voot) वर पाहावे लागणार आहेत. विशेष म्हणजे या लिलावातून तब्बल 44 हजार 75 कोटींना टीव्ही आणि डिजीटल राईट्सची विक्री झाली आहे. बीसीसीआयच्या सूत्रांनी ही माहिती पीटीआयला (PTI) दिली आहे.

आयपीएलच्या पुढील पाच हंगामासाठी म्हणजेच 2023 ते 2027 या कालावधीत आयपीएल प्रसारण हक्कांसाठीची लिलाव प्रक्रिया आज पूर्ण झाली. भारतीय उपखंडासाठी टिव्ही आणि डिजिटल हक्क यावेळी विकण्यात आले आहेत. रिपोर्ट्सनुसार हा व्यवहार 44 हजार 75 कोटींमध्ये झाल्याची माहिती समोर आली आहे. यावेळी टीव्हीसाठीचे हक्क डिजनी स्टारने आपल्याकडे कायम ठेवले यासाठी त्यांनी 23 हजार 575 कोटी रुपये मोजले. तर डिजीटल प्लॅटफॉर्मसाठीचे हक्क 20 हजार 500 कोटींना वायकॉम 18 कंपनीला विकले गेले आहेत. आयपीएलच्या 410 सामन्यांसाठी या हक्कांची विक्रि झाल्याने एका सामन्यातून जवळपास 107 कोटींची कमाई बीसीसीआय करणार आहे. यामध्ये टीव्हीच्या माध्यमातून एका सामन्यांतून जवळपास 57 कोटी तर डिजीटल प्लॅटफॉर्मवर एका सामन्यातून 50 कोटींची कमाई बीसीसीआय करेल.

इतर दोन पॅकेजसचं काय?

यावेळी चार वेगवेगळ्या पॅकेजससाठी लिलाव प्रक्रिया पार पडली. ज्यामध्ये पहिलं पॅकेज ए हे भारतीय उपखंडासाठी IPL सामने टीव्हीवर प्रसारण करण्याच्या राइट्ससाठी होतं. जे 23 हजार 575 कोटींना विकलं गेलं. तर पॅकेज बी डिजीटल प्लॅटफॉर्मसाठीच्या हक्कासाठी असून 20 हजार 500 कोटींना हे पॅकेज विकलं गेलं. तर पॅकेज सीमध्ये एका सीजनच्या 18 निवडक सामन्यांच्या प्रसारणाचे हक्क असणार आहे. यात सीजनचा पहिला सामना, वीकएंडदिवशी होणारे डबल हेडरमधील सायंकाळचे सामना, चार प्लेऑफचे सामने यासाठी बोली लावण्यात आली. हे पॅकेज 1813 कोटींना विकलं गेल्याची माहिती रिपोर्ट्सनुसार समोर आली आहे. तर चौथं पॅकेज ज्यात भारतीय उपमहाद्वीपच्या बाहेरील टीव्ही आणि डिजीटल ब्रॉडकास्टचे राइट्स असतील. याचा लिलाव मंगळवारी पार पडेल अशी माहिती समोर आली आहे.  

हे देखील वाचा-