MI vs LSG Result : मुंबईला विजय मिळता मिळेना, लखनौकडून 18 धावांनी मात, स्पर्धेतील सलग सहावा पराभव
IPL : आतापर्यंतच्या आयपीएल 2022 मध्ये एकही सामना न जिंकलेल्या मुंबईला आज देखील पराभव पत्करावा लागला आहे. स्पर्धेतील हा मुंबईचा सलग सहावा पराभव आहे.
MI vs LSG : आयपीएलमधील 2022 (IPL 2022) 26 व्या सामन्यात लखनौने मुंबईला 18 धावांनी पराभूत करत स्पर्धेतील चौथा विजय मिळवला आहे. तर बलाढ्य मुंबई संघाला सलग सहावा पराभव पत्करावा लागला आहे. मुंबईच्या ब्रेबॉर्न मैदानात झालेल्या मुंबई इंडियन्स विरुद्ध लखनौ सुपरजायंट्स (MI vs LSG) या सामन्यात लखनौचा कर्णधार केएल राहुलच्या दमदार शतकामुळे मुंबईसमोर त्यांनी 200 धावांचे आव्हान ठेवले. हे पूर्ण करताना मुंबईचे सर्वच फलंदाज स्वस्तात माघारी परतत होते. सूर्यकुमार आणि तिलक वर्मा यांनी काहीसा डाव सावरण्याचा प्रयत्न केला. पण त्यांनाही खास कमाल दाखवता आली नाही. अखेरच्या काही षटकात पोलार्ड क्रिजवर होता पण तोही मुंबईला विजय मिळवून देऊ शकला नाही.
सामन्यात मुंबई इंडियन्सने नाणेफेक जिंकत प्रथम गोलंदाजी करण्याचा निर्णय घेतला. त्यामुळे लखनौचे सलामीवीर मैदानात आले. डि कॉक आणि राहुलने धडाकेबाद सुरुवात केली खरी पण डि कॉक 24 धावा करुन तंबूत परतला. मग मनिष आणि राहुलने एख दमदार अशी भागिदारी रचली पण पांडे 38 धावा करुन तंबूत परतल्यानंतरही राहुलने फटकेबाजी कायम ठेवली. स्टॉयनिसने 10 तर दीपकने 15 धावांची साथ राहुलला दिली. ज्यामुळे लखनौने 199 धावा स्कोरबोर्डवर लावल्या. राहुलने 60 चेंडूत 9 चौकार आणि 5 षटकार ठोकत नाबाद 103 धावा केल्या. मागील हंगामापर्यंत सर्वात दमदार असं बोलिंग युनिट म्हणून ओळखल्या जाणाऱ्य मुंबईकडे यंदा बुमराह सोडता सर्व नवे गोलंदाज आहेत. त्यामुळे मुंबईला गोलंदाजीत कमाल करता येत नाही असल्याचं दिसून येत आहे. त्यात आज मुंबईने खराब गोलंदाजीसह खराब क्षेत्ररक्षणही केलं. अनेकदा खराब क्षेत्ररक्षणामुळे चौकार गमावल्याचं दिसून आलं. मुंबईने मोठ्या विश्वासाने संघात घेतलेल्या इंग्लंडच्या टायमल मिल्सच्या गोलंदाजीवर आज तुफान फटकेबाजी झाली. त्याला तीन षटकात 54 धावा आल्या. दुसरीकडे फेबियन एलनच्या चार षटकात देखील 46 धावा आल्या. केवळ बुमरहाने 24 चेंडूत 24 धावा देत दिल्या. विकेट्सचा विचार करता उनडकटने दोन, मुरगन आणि फेबियन एलनने प्रत्येकी एक विकेट घेतली.
मुंबईच्या फलंदाजांचा फ्लॉप शो
200 धावांचे आव्हान पार करताना मुंबईचे सलामीवीर आजही फेल झाले. रोहित सहा तर ईशान 13 धावाच करु शकला. ब्रेव्हिसने 13 चेंडूत 31 धावा ठोकत तुफान फटकेबाजी केली. पण आज एका मोठ्या खेळीची मुंबईला गरज होती. त्यानंतर तिलक आणि सूर्यकुमारने संघाचा डाव बऱ्यापैकी सावरला. पण तिलक 26 आणि त्यानंतर सूर्यकुमार 37 धावा करुन तंबूत परतला. अखेरच्या काही षटकात पोलार्डने विजय मिळवून देण्यासाठी संपूर्ण प्रयत्न केले. पण त्याची 25 धावांची खेळी मुंबईला विजय मिळवून देऊ शकली नाही. उनाडकटनेही 14 धावांची खेळी केली, जी मुंबईला विजयाजवळ घेऊन गेली खरी पण अखेर 18 धावा कमी पडल्याने मुंबई पराभूत झाली.
हे देखील वाचा-
महत्त्वाच्या बातम्या
