DC vs PBKS, IPL 2022 : दिल्ली संघात कोरोनाच्या शिरकावामुळे आयपीएलच्या सामन्यात बदल; पुण्याऐवजी मुंबईत होणार सामना

Covid Outbreak in IPL : मागील दोन वर्षे कोरोनाच्या सावटाखाली आयपीएलमध्ये बरीच अडचण आली त्यानंतर आता आयपीएलच्या 15 व्या हंगामावर देखील कोरोनाचं संकट येण्याची शक्यता आहे.

IPL 2022

Covid Outbreak in IPL : आयपीएलच्या 15 व्या (IPL 2022) हंगामावर देखील आता कोरोनाचं सावट गडद होताना दिसत आहे. दिल्ली संघाशी संबधित पाच जणांना कोरोनाची लागण झाली असून यात परदेशी खेळाडूचाही समावेश आहे. त्यामुळे आता बीसीसीआयने एक महत्त्वाचा बदल केला आहे. दिल्ली संघाच्या पंजाब किंग्ससोबत होणाऱ्या बुधवार 20 एप्रिल रोजीच्या सामन्याचं ठिकाण पुण्यावरुन बदलून मुंबई करण्यात आलं आहे. आधी हा सामना पुण्याच्या एमसीए मैदानात (MCA Stadium) होणार होता. पण आता हा सामना मुंबईच्या ब्रेबॉर्न (Brabourne) मैदानात पार पडणार आहे. मंगळवारी बीसीसीयने याबाबतची माहिती दिली.

सद्यस्थितीला दिल्ली संघातील फिजियो पॅट्रिक फरहार्ट (15 एप्रिल), मसाज थेरपिस्ट चेतन कुमार (16 एप्रिल), खेळाडू मिचेल मार्श (18 एप्रिल), संघाचे डॉक्टर अभिजीक साळवी (18 एप्रिल) आणि सोशल मीडिया कटेंट टीम मेंबर आकाश माने (18 एप्रिल) यांना कोरोनाची लागण झाली आहे. दरम्यान सध्या सर्व संघ मुंबईत असून 20 तारखेच्या सामन्यासाठी पुण्याला संघ जाताना इतक्या लाबंच्या प्रवासात एकाच बसमधून जाताना कोरोनाचा प्रादुर्भाव आणखी होण्याची भिती असल्याने हा निर्णय घेतल्याचं बीसीसीआयने सांगितलं आहे. कोरोनाबाधित सर्व रुग्णांना सध्या विलगीकरणात आणि देखरेखीखाली ठेवण्यात आलं आहे. सर्व संघाच्या आणि स्टाफच्या दररोज आरटीपीसीआर (RT-PCR) टेस्ट होत आहेत. आज 19 एप्रिल रोजी झालेल्या सर्व चाचण्या निगेटिव्ह आल्या असून आता उद्या अर्थात 20 एप्रिल रोजी सकाळी पुन्हा चाचणी केली जणार आहे. 

मागील वर्षी अर्थात 2021 मध्ये कोरोना महामारीमुळे आयपीएल 2021 चा हंगाम 4 मे 2021 रोजी अर्ध्यातूनच थांबवावा लागला होती. त्यानंतर उर्वरित आयपीएल सामने दुबईमध्ये घेण्यात आले होते. 2021 मध्ये सनराइजर्स हैदराबाद (SRH) चा विकेटकीपर ऋद्धिमान साहा आणि दिल्ली कॅपिटल्सचा फिरकीपटू अमित मिश्रा यांना कोरोनाचा संसर्ग झाला होता. त्यानंतर आयपीएलचे सामने स्थगित कऱण्यात आले होते. 2021 मध्ये 29 लीग सामने झाल्यानंतर बायो बबलमध्ये कोरोनाचा शिरकाव झाला होता. त्यानंतर बीसीसीआयने उर्वरित सामने दुबईमध्ये खेळवले होते.   तर कोरोना महामारीमध्ये 2020 चा हंगामही दुबईत झाला होता.  

हे देखील वाचा-