IND Vs WI, 2nd ODI : दुसऱ्या एकदिवसीय सामन्यात भारत 44 धावांनी विजयी, मालिकेतही विजयी आघाडी

IND Vs WI, 2nd ODI : भारत आणि वेस्ट इंडिज यांच्यातील तीन सामन्यांच्या एकदिवसीया मालिकेत भारताने दुसरा सामनाही जिंकला आहे.

India_Won

IND Vs WI, 2nd ODI : अहमदाबादच्या नरेंद्र मोदी मैदानात (Narendra Modi Stadium) पार पडलेल्या भारत आणि वेस्ट इंडिज यांच्यातील दुसऱ्या एकदिवसीय सामन्यात (IND Vs WI 2nd ODI) भारताने 44 धावांनी विजय मिळवला आहे. या विजयासह तीन सामन्यांच्या एकदिवसीय मालिकेतही भारताने दोन सामने जिंकत 2-0 अशी विजयी आघाडी घेतली आहे. सामन्यात भारतानं 50 षटकात 9 विकेट्स गमावून वेस्ट इंडीजच्या संघासमोर 238 धावांचं लक्ष्य ठेवलं ज्यानंतर वेस्ट इंडिजला 193 धावांत सर्वबाद करत भारताने 44 धावांनी सामना जिंकला.

सामन्यात नाणेफेक जिंकत वेस्ट इंडिजने प्रथम गोलंदाजी घेतली. ज्यानंतर भारताकडून सलामीला मैदानात आलेला कर्णधार रोहित शर्मा (5 धावा, 8 बॉल) स्वस्तात माघारी परतला. शाई होपच्या गोलंदाजीवर त्यानं तिसऱ्या षटकातच आपली विकेट्स गमावली. त्यानंतर ऋषभ पंत आणि विराट कोहली यांनी संघाचा डाव सावरण्याचा प्रयत्न केला. मात्र, जेसन होल्डरच्या गोलंदाजीवर रिषभ 18 धावांवर असताना बाद झाला. दरम्यान, विराटही मोठी धाव संख्या उभारण्यास अपयशी ठरला. त्यालाही केवळ 18 धावा करत्या आल्या. भारतानं तीन विकेट्स गमवल्यानंतर केएल राहुल आणि सुर्यकुमार यादवनं संयमी खेळी करत भारताचा डाव सावरला. केएल राहुलनं 49 तर, सुर्यकुमारनं 64 धावा केल्या. परंतु, अल्झारी जोसेफनं 29 व्या षटकात केएल राहुल आणि 39 व्या षटकात सुर्यकुमारला माघारी धाडलं. त्यानंतर वॉशिंग्टन सुंदर (24 धावा 42 बॉल), शार्दुल ठाकूर (8 धावा, 15 बॉल), मोहम्मद सिराज (3 धावा 5 बॉल), युझवेंद्र चहलनं नाबाद 11 धावा केल्या. ज्यामुळं भारतीय संघाला 50 षटकात 9 विकेट्स गमावून 237 धावापर्यंत मजल मारता आली. वेस्ट इंडिजकडून ओडेन स्मिथ आणि अल्झारी जोसेफनं प्रत्येकी दोन-दोन विकेट्स घेतल्या. तर, केमार रोच, जेसन होल्डर, अकेल होसेन आणि फॅबियन ऍलन यांना प्रत्येकी एक-एक विकेट्स मिळाली.

प्रसिधची चमकदार कामगिरी

ज्यानंतर वेस्ट इंडिजचा संघ 238 धावा करण्यासाठी मैदानात आला. पण भारतीय गोलंदाजांनी सुरुवातीपासून कसून गोलंदाजी केली. ज्यामुळे वेस्ट इंडिजला लक्ष्यापर्य़ंत पोहोचता आले नाही. केवळ शामराह ब्रूक्स य़ाने 44 धावा केल्या तर अकेल होसेनने 34 धावांची झुंज दिली. पण इतर फलंदाज फेल ठरल्याने वेस्ट इंडिजचा संघ 46 ओव्हरमध्ये 193 धावा करुन सर्वबाद झाला आणि भारताने 44 धावांनी सामना जिंकला. यावेळी भारताकडून प्रसिध कृष्णाने सर्वाधिक चार, शार्दूलने दोन तर चहल, सुंदर, हुडा आणि सिराज यांनी प्रत्येकी एक विकेट घेतली.

हे देखील वाचा-

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोडी पाहा लाईव्ह - ABP Majha