Kolhapur Football : चंद्रकांत चषक 'पीटीएम'ने पटकावला, शिवाजी तरुण मंडळाला उपविजेतेपद; स्पर्धेला प्रेक्षकांचा उत्स्फूर्त प्रतिसाद

पीटीएमने शिवाजी तरुण मंडळाचा 3-1 असा पराभव करत चंद्रकांत चषक 2023 वर नाव कोरले. विजेत्या पीटीएम संघाला 2 लाख 31 हजार रुपये आणि चषक तर उपविजेत्या संघाला 1 लाख 31 हजार रुपये आणि चषक देऊन गौरवण्यात आले

Kolhapur Football

चंद्रकांत चषक 2023 फुटबॉल स्पर्धेत स्पर्धेतील अंतिम सामना पाटाकडील तालीम मंडळ विरूध्द श्री शिवाजी तालीम मंडळ यांच्यात पार पडला.

पीटीएम संघाने शिवाजी तरुण मंडळाचा 3-1असा पराभव करून चषकावर नाव कोरले.

विजेत्या पीटीएम संघाला 2 लाख 31 हजार रुपये आणि चषक तर उपविजेत्या शिवाजी संघाला 1 लाख 31 हजार रुपये आणि चषक देऊन गौरवण्यात आले.

अंतिम सामन्याची सुरवात श्रीमंत यशराज छत्रपती, तेजस सतेज पाटील, आरबीएलचे मार्केटिंग हेड अभिजीत सोमवंशी, प्रकाश गुप्ता, काँग्रेसच्या औद्योगिक सेलचे प्रदेश सचिव व युवा उद्योजक सत्यजित जाधव, चेतन नरके, जयश्री चंद्रकांत (आण्णा) जाधव फाउंडेशनच्या अध्यक्षा डॉ. दश्मिता सत्यजित जाधव, रोहीत पाटील यांच्या हस्ते करण्यात आली.

एकूण 5 लाख रुपयांच्या बक्षिसांचा वर्षाव खेळाडूंवर करणाऱ्या फुटबॉल स्पर्धेविषयी शौकिनांमध्ये सुरुवातीपासून उत्सुकता होती.

अंतिम फेरीत 'पाटाकडील' आणि 'श्री शिवाजी' यांच्यातील सामन्यासाठी मोठी गर्दी होण्याची शक्यता लक्षात घेऊन नियोजन करण्यात आले होते.

सामना पाहण्यासाठी फुटबॉल शौकिनांनी मोठी गर्दी केल्याने मैदान खचाखच भरले होते.

सामन्यात मध्यंतरावेळी आदरणीय श्रीमंत छत्रपती शाहू महाराज यांच्या अमृत महोत्सवी वाढदिवसानिमित्त केक कापण्यात आला.

यावेळी माजी आमदार मालोजीराजे छत्रपती, मधुरीमाराजे छत्रपती, आमदार जयश्री जाधव, युवा उद्योजक व काँग्रेस औद्योगिक सेलचे सचिव सत्यजित जाधव, तेजस सतेज पाटील, रोहीत पाटील यांच्या उपस्थितीत शाहू महाराजांचा मैदानावर वाढदिवस साजरा करण्यात आला.

यावेळी "चौक"या मराठी चित्रपटाची टीम, दिग्दर्शक देवेंद्र गायकवाड, अभिनेत्री संस्कृती बालगुडे, अभिनेते किरण गायकवाड, रमेश परदेशी, शुभंकर एकबोटे, अक्षय टाकसाळे उपस्थित होते.