Rain : उत्तर भारतात मुसळधार पाऊस, उत्तराखंडसह हिमाचलचे मोठं नुकसान

सध्या उत्तर भारतात मुसळधार पाऊस सुरु आहे. अनेक भागात या पावसामुळं जनजीवन विस्कळीत झालं आहे.

Rain News

उत्तर भारतात मुसळधार पाऊस कोसळत आहे. गेल्या काही दिवसांपासून सुरु असलेल्या सततच्या पावसामुळं उत्तराखंड (Uttarakhand) आणि हिमाचल प्रदेशमध्ये (Himachal Pradesh) मोठं नुकसान झालं आहे.

मुसळधार पावसामुळं हिमाचल आणि उत्तराखंडमध्ये 65 हून अधिक लोकांचा मृत्यू झाला आहे.

नदी नाल्यांच्या पाणी पातळीत मोठी वाढ झाली आहे. त्यामुळं नागरिकांना सतर्क राहण्याच्या सूचना दिल्या आहेत.

हवामान विभागानं दिलेल्या माहितीनुसार, या दोन्ही राज्यात मुसळधार पावसाची शक्यता वर्तवली आहे. दोन्ही राज्यांमध्ये पावसाचा रेड अलर्ट जारी करण्यात आला आहे.

हिमाचल प्रदेश आणि उत्तराखंड या दोन्ही राज्यांमध्ये भूस्खलन, पूर, ढगफुटी आणि अतिवृष्टीमुळे अनेकांचा मृत्यू झाला आहे. मालमत्तेचेही मोठ्या प्रमाणात नुकसान झालं आहे.

पाऊस आणि भूस्खलनामुळे येथील पायाभूत सुविधा उद्ध्वस्त झाल्या आहेत. तसेच या दोन्ही राज्यात शेती पिकांना देखील मोठा फटका बसला आहे.

पूरस्थिती निर्माण झाल्यामुळं हिमाचलमध्ये स्वातंत्र्यदिनाचे कोणतेही कार्यक्रम घेण्यात आले नाहीत. साध्या पद्धतीनं सोहळ्याचं आयोजन करण्यात आलं होतं.

सोमवारपासून सुरु असलेल्या पावसामुळं हिमाचल प्रदेशमध्ये आतापर्यंत सुमारे 55 जणांना आपला जीव गमवावा लागला आहे.

सध्या मदत आणि बचावकार्य सुरू आहे. अडकलेल्या लोकांची सुटका करण्यावर भर असल्याची माहिती प्रशासनाकडून देण्यात आली आहे. चंदीगड-शिमला 4-लेन महामार्गासह इतर प्रमुख रस्ते खुले करण्यात आले आहेत.