Mutual Fund : 2025 मध्ये इक्विटी म्युच्युअल फंडमधील गुंतवणूक घटली, घसरणीची कारणं समोर, SIP मुळं बाजाराला दिलासा

Equity Mutual Fund : भारतीय शेअर बाजारातील इक्विटी म्युच्युअल फंडमधील गुंतवणूक 2025 मध्ये घटल्याचं समोर आलं आहे. याची कारणं काय ते जाणून घेणं महत्त्वाचं आहे.

म्युच्युअल फंड योजना

इक्विटी म्युच्युअल फंड मधील गुंतवणूक 2025 मध्ये घटली आहे. करोनाच्या लाटेच्या काळात 2020 मध्ये इक्विटी म्युच्युअल फंडमधील गुंतवणूक कमी झाली होती. त्यानंतर चार वर्षानंतर प्रथमच गुंतवणूक घटली आहे.

इक्विटी म्युच्युअल फंडनं गेल्या दोन वर्षात कमी परतावा दिल्यानं आणि न्यू फंडस ऑफर म्हणजे एनएफओनं अपेक्षित कामगिरी न केल्यानं इक्विटी म्युच्युअल फंडमधील गुंतवणूक घटली आहे. मात्र, एसआयपीद्वारे होणारी गुंतवणूक कायम असल्यानं सकारात्मक वाढ दिसून आली आहे.

असोसिएशन ऑफ म्युच्युअल फंडस इन इंडियाच्या डेटानुसार इक्विटी म्युच्युअल फंडमधील इन फ्लो जानेवारी ते नोव्हेंबर 2025 मध्ये 3.22 लाख कोटी इतका होता. त्याच्या गेल्या वर्षी म्हणजे 2024 मध्ये इक्विटी म्युच्युअल फंडमधील जानेवारी ते नोव्हेंबर या कालावधीतील इन फ्लो 3.94 लाख कोटी इतका होता.

इक्विटी म्युच्युअल फंड योजनांमध्ये डिसेंबर 2020 मध्ये 16078.4 कोटी रुपयांची गुंतवणूक झाली होती. तर, 2024 च्या डिसेंबर महिन्यातील गुंतवणूक 41156 कोटी इतकी होती.

2024 मध्ये जानेवारी ते नोव्हेंबर या कालावधीत 239 न्यू फंड ऑफर्सच्या माध्यमातून 1.19 लाख कोटींची उभारणी करण्यात आली होती. तर,2025 मध्ये जानेवारी ते नोव्हेंबरया कालावधीत 221 न्यू ऑफर्सच्या माध्यमातून 63586 कोटींची उभारणी झाली. थीमॅटिक एनएफओनं 2025 मध्ये 21606 कोटी उभारले तर 2024 मधील आकडेवारी 79109 कोटी रुपये होती.

स्मॉल कॅफ, मिड कॅप आणि लार्ज कॅपमधील इनफ्लोनं 2025 मध्ये उच्चांक गाठला आहे. 2025 मध्ये स्मॉल कॅपमध्ये 48497 कोटी, मिडकॅपमध्ये 45763 आणि लार्ज कॅपमध्ये 23916 कोटी रुपये आले.

(टीप- शेअर बाजार, म्यूच्यूअल फंड हे जोखमीच्या अधीन असतात. या लेखात दिलेली माहिती ही प्राथमिक स्वरुपाची असून आम्ही कोणताही दावा करत नाही. या लेखामागचा गुंतवणुकीसाठी शिफारस, सल्ला देण्याचा उद्देश नाही. तुम्हाला गुंतवणूक करायची असेल तर या क्षेत्रातील तज्ज्ञांचा सल्ला घ्या.)