Rishi Sunak : ब्रिटनच्या पंतप्रधानपदाच्या शर्यतीत भारतीय वंशाचे ऋषी सुनक आघाडीवर, नारायण मूर्तींचे आहेत जावई

बोरीस जॉन्सन यांनी ब्रिटनच्या पंतप्रधानपदाचा राजीनामा दिल्यास पुढील पंतप्रधान कोणाला करणार? असा प्रश्न उपस्थित होत आहे. शर्यतीत 6 नावे आहेत. भारतीय वंशाचे ऋषी सुनक हे आघाडीवर असल्याचे मानले जाते. 

Rishi Sunak

Rishi Sunak : ब्रिटनचे अर्थमंत्री ऋषी सुनक (Rishi Sunak) आणि आरोग्य सचिव साजिद जाविद यांनी मंगळवारी राजीनामा दिला. दोन्ही मंत्र्यांनी पंतप्रधान बोरीस जॉन्सन यांच्या कार्यक्षमतेबद्दल आणि सरकारच्या कार्यपद्धतीवर गंभीर प्रश्न उपस्थित केले आहेत. सुनक आणि साजिद यांच्यानंतर बाल आणि कुटुंब मंत्री विल क्विन्स आणि संसदेच्या खासगी सचिव लॉरा ट्रॉट यांनीही राजीनामा दिला आहे. या राजीनाम्यांनंतर पंतप्रधान बोरिस जॉन्सन यांच्यावर खुर्ची सोडण्याचा दबावही वाढला आहे.

कोरोनाच्या काळात पार्टी करणाऱ्या जॉन्सन यांना गेल्या महिन्यात अविश्वास प्रस्तावाला सामोरे जावे लागले. मात्र, आता जॉन्सन यांनी राजीनामा दिल्यास त्यांचा कंझर्व्हेटिव्ह पक्ष पुढील पंतप्रधान कोणाला करणार? असा प्रश्न उपस्थित होत आहे. शर्यतीत 6 नावे आहेत. भारतीय वंशाचे ऋषी सुनक हे आघाडीवर असल्याचे मानले जाते. 

ऋषी सुनक

जॉन्सनच्या निवडणूक प्रचारात ऋषींनी महत्त्वाची भूमिका बजावली होती. प्रेस ब्रीफिंग्जमध्येही तेच दिसून आले. बोरिस यांच्या जागी ऋषींनी टीव्ही डिबेटमध्ये भाग घेतल्याचे अनेक प्रसंग आले आहेत.

नारायण मूर्तींच्या मुलीशी विवाह

सुनकने इन्फोसिसचे सह-संस्थापक नारायण मूर्ती यांची मुलगी अक्षतासोबत लग्न केले आहे. 2015 मध्ये ते पहिल्यांदा खासदार झाले. ब्रेक्झिटला जोरदार पाठिंबा देऊन ते त्यांच्या पक्षात शक्तिशाली झाले. ब्रिटनला युरोपियन युनियनमधून बाहेर काढण्याच्या बोरिस जॉन्सन यांच्या धोरणाचे समर्थन केले. लोकप्रियता असूनही, पत्नी अक्षतावर करचुकवेगिरीच्या आरोपांमुळे सुनक यांना टीकेचा सामना करावा लागला.

वास्तविक, अक्षताकडे ब्रिटिश नागरिकत्व नाही. ब्रिटीश कायद्यानुसार, अक्षताला यूके बाहेरून तिच्या कमाईवर कोणताही कर भरावा लागत नाही. ब्रिटिश नागरिकांना हा कर भरावा लागतो. त्यामुळे सुनक आणि अक्षता यांच्यावर प्रश्न निर्माण झाले. दुसरीकडे सुनक यांनी ब्रिटिश नागरिकांवर कराचा बोजा वाढवल्याचाही आरोप आहे.

2. लिज ट्रस

46 वर्षीय लिझ ट्रस यांचे पूर्ण नाव एलिझाबेथ मेरी ट्रस आहे. त्या दक्षिण पश्चिम नॉर्थफोकच्या खासदार आहेत. लिझ या फॉरेन कॉमन वेल्थ आणि डेव्हलपमेंट अफेअर्स सचिव आहेत. त्या खूप लोकप्रियही आहेत. गेल्यावर्षी युरोपियन युनियनशी वाटाघाटी करण्याची महत्त्वाची जबाबदारी त्यांच्यावर सोपवण्यात आली होती.

3. जेरेमी हंट

55 वर्षीय परराष्ट्र सचिव 2019 च्या निवडणुकीत दुसऱ्या क्रमांकाचे सर्वात लोकप्रिय नेते होते. त्यांची सार्वजनिक प्रतिमा निष्कलंक आहे. जेरेमी कोणताही वाद निर्माण न करता गांभीर्याने सरकार चालवतील, असा विश्वास पक्षाच्या लोकांना आहे.

4. नदीम जाहवी

सुनक यांच्या राजीनाम्यानंतर जॉन्सन यांनी नदिम जाहवी यांची नवे अर्थमंत्री म्हणून नियुक्ती केली. पंतप्रधानपदाच्या दावेदारांमध्ये नदीम जाहवी काहीसा वेगळे आहेत. नदीम लहानपणी इराकमधून निर्वासित म्हणून ब्रिटनमध्ये आले 2010 मध्ये ते पहिल्यांदा खासदार झाले. जाहवी नुकतेच म्हणाले होते की, माझी ब्रिटनच्या पंतप्रधानपदी निवड झाली तर ते माझे भाग्य असेल.

5. पेनी मॉर्डेंट

माजी संरक्षण मंत्री पेनी याही पंतप्रधानपदाच्या शर्यतीत आहेत. मागील निवडणुकीत हंटला पाठिंबा दिल्याबद्दल जॉन्सन यांनी पेनी यांना सरकारमधून काढून टाकले होते. पेनी युरोपियन युनियन सोडण्याच्या बाजूने आघाडीवर होत्या. जेव्हा ब्रिटनमध्ये युरोपियन युनियन सोडण्याचा मुद्दा तापला तेव्हा पेनी यांनी संध्याकाळच्या टीव्ही शोमध्ये भाग घेतला होता. त्यामुळे चांगलीच चर्चा रंगली होती. 

6. बेन वॉलेस

बेन वॉलेस हे संरक्षण मंत्री आहेत. ब्रिटिश रॉयल आर्मीमध्ये सेवा केली. रशिया-युक्रेन युद्धात ब्रिटनच्या भूमिकेबद्दल ते चर्चेत आले. युक्रेनला लष्करी मदत देण्यात त्यांचा महत्त्वाचा वाटा आहे. 1999 मध्ये त्यांचा राजकीय प्रवास सुरू झाला. 2005 मध्ये संसदेत पोहोचले. बेन 2016 मध्ये गृह सुरक्षा मंत्री होते. अफगाणिस्तानातून ब्रिटीश नागरिकांना बाहेर काढण्यात त्यांचा मोलाचा वाटा होता.

इतर महत्वाच्या बातम्या