Nobel Peace Prize: ट्रम्प प्रेमाचे पाकिस्तानी आंतरराष्ट्रीय गोडवे सुरुच! युद्धबंदीचे श्रेय देत थेट नोबेल शांतता पुरस्कारासाठी शिफारस
Nobel Peace Prize: पाकिस्तान सरकारने आपल्या अधिकृत निवेदनात म्हटले आहे की ट्रम्प यांनी नवी दिल्ली आणि इस्लामाबाद या दोन्ही देशांशी चर्चा करून युद्धबंदीत महत्त्वाची भूमिका बजावली.
Nobel Peace Prize: पाकिस्तान सरकारने 2026 च्या नोबेल शांतता पुरस्कारासाठी अमेरिकेचे राष्ट्राध्यक्ष डोनाल्ड ट्रम्प यांचे नाव सुचवले आहे. भारत-पाकिस्तान युद्धादरम्यान ट्रम्प यांच्या राजनैतिक पुढाकार आणि मध्यस्थीमुळे मोठे युद्ध टाळण्यास मदत झाली, असे पाकिस्तानचे म्हणणे आहे. पाकिस्तान सरकारने आपल्या अधिकृत निवेदनात म्हटले आहे की ट्रम्प यांनी नवी दिल्ली आणि इस्लामाबाद या दोन्ही देशांशी चर्चा करून युद्धबंदीत महत्त्वाची भूमिका बजावली. यामुळे दोन अणुशक्ती असलेल्या देशांमधील युद्धाची शक्यता टळली.
तरी मला नोबेल मिळणार नाही
पाकिस्तानने ट्रम्प यांच्या काश्मीर प्रश्नावर मध्यस्थीच्या ऑफरचे कौतुक केले आणि म्हटले की जोपर्यंत काश्मीरचा प्रश्न सुटत नाही तोपर्यंत या प्रदेशात कायमस्वरूपी शांतता येऊ शकत नाही. तथापि, ट्रम्प म्हणाले की मी कितीही युद्धे थांबवली, मी काहीही केले तरी मला नोबेल मिळणार नाही. ट्रम्प यांनी दावा केला आहे की त्यांनी भारत आणि पाकिस्तानमधील युद्ध टाळण्यात, रशिया-युक्रेन आणि इराण-इस्रायल सारखे वाद सोडवण्यात महत्त्वाची भूमिका बजावली, परंतु त्यांना नोबेल शांतता पुरस्कार मिळणार नाही.
ट्रम्प यांनी शुक्रवारी 'ट्रुथ सोशल' वर पोस्ट करत लिहिले की, "मी काहीही केले तरी मला नोबेल शांतता पुरस्कार मिळणार नाही. मी, परराष्ट्र मंत्री मार्को रुबियो यांच्यासोबत, कांगो-रवांडा युद्ध थांबवण्यासाठी शांतता करारात मध्यस्थी केली. हा एक रक्तरंजित संघर्ष होता जो अनेक दशकांपासून सुरू होता." मुनीर यांनी यापूर्वी ट्रम्प यांना नोबेल देण्याची मागणी देखील केली होती. यापूर्वी ट्रम्प यांनी बुधवारी व्हाईट हाऊसमध्ये बंद खोलीत पाकिस्तानचे लष्करप्रमुख जनरल असीम मुनीर यांची भेट घेतली होती. दोघांनीही व्हाईट हाऊसच्या कॅबिनेट रूममध्ये एकत्र जेवण केले. पाकिस्तानच्या लष्करप्रमुखांचे आदरातिथ्य करण्याची ही पहिलीच वेळ होती.
ट्रम्प यांना नोबेल शांतता पुरस्कार देण्याची मागणी करणाऱ्या मुनीर यांच्या विधानानंतर ट्रम्प-मुनीर बुधवारी भेटले. व्हाईट हाऊसच्या प्रवक्त्या अॅना केली म्हणाल्या की, मुनीर यांनी मे महिन्यात भारत आणि पाकिस्तानमधील संघर्ष थांबवण्याचे श्रेय ट्रम्प यांना दिले आहे. त्यांच्या विधानाचा सन्मान म्हणून ट्रम्प यांनी त्यांना जेवणासाठी आमंत्रित केले होते. असीम मुनीर सध्या अमेरिकेच्या दौऱ्यावर आहेत. ट्रम्प यांच्या भेटीच्या काही तास आधी पंतप्रधान नरेंद्र मोदी यांनी अमेरिकन राष्ट्राध्यक्षांशी 35 मिनिटांची फोनवर चर्चा केली. या दरम्यान मोदींनी स्पष्टपणे सांगितले होते की 7 ते 10 मे पर्यंत चाललेल्या ऑपरेशन सिंदूर नंतर, भारत आणि पाकिस्तानी सैन्यांमधील चर्चेनंतर युद्धबंदी झाली. कोणत्याही बाह्य मध्यस्थीने नाही.
सप्टेंबरमध्ये अधिकृत नामांकने सुरू होतील
नोबेल पुरस्कार 2026 साठी अधिकृत नोंदणी सप्टेंबरमध्ये सुरू होईल. तथापि, अद्याप शेवटची तारीख जाहीर केलेली नाही. नोबेल शांतता पुरस्कार 2025 साठी नामांकनाची शेवटची तारीख 31 जानेवारी होती. नोबेल शांतता पुरस्कार 2025 साठी 338 नामांकने करण्यात आली होती. त्यापैकी 244 व्यक्ती आणि 94 संस्था होत्या. 2023 मध्ये या पुरस्कारासाठी 286 उमेदवारांना नामांकन देण्यात आले होते. 2016 मध्ये सर्वाधिक 376 नामांकने होती. नोबेल नामांकित व्यक्तींची नावे 50 वर्षांपासून उघड केली जात नाहीत.
इतर महत्वाच्या बातम्या
महत्त्वाच्या बातम्या
