'डंकी' मार्गाने युरोप गाठण्याच्या प्रयत्नात 44 पाकिस्तानींचा समुद्रात बुडून मृत्यू, 'डंकी'च्या नादात जगभरात 2024 मध्ये10 हजार जणांचा अंत
Boat Capsized Near Morocco : दरवर्षी लाखो पाकिस्तानी चांगल्या जीवनाच्या शोधात युरोपात स्थलांतरित होतात. यापैकी बहुतेक लोक बेकायदेशीर पद्धती म्हणजेच डंकी मार्गाचा अवलंब करतात.
Boat Capsized Near Morocco : किंग खान शाहरुखच्या डंकी चित्रपटाने अवैधरित्या युरोप अमेरिकेत घुसखोरी करणााऱ्यांची अवस्था दाखवून दिली होती. हा मार्ग किती खडतर आहे याचाही अंदाज दिला होता. आता तसाच प्रकार पाकिस्तानींच्या बाबतीत घडला आहे. बेकायदेशीरपणे युरोपला जाणारे 44 पाकिस्तानी नागरिक अटलांटिक महासागरात बुडाले. पाकिस्तानी वेबसाइट डॉनने दिलेल्या माहितीनुसार, पश्चिम आफ्रिकेतून स्पेनला जाणारी एक बोट मोरोक्कोमधील डाखला बंदराजवळ बुडाली.
बोटीवर 80 हून अधिक लोक
बोटीवर 80 हून अधिक लोक होते. यामध्ये 50 हून अधिक लोकांचा मृत्यू झाला असून त्यात बहुतांश पाकिस्तानी आहेत. वृत्तानुसार, प्रवासादरम्यान लोकांना घेऊन जाणारे जहाज बेपत्ता झाले होते. त्याचा शोध घेण्याचा प्रयत्न केला असता सापडले नाही. पाकिस्तानचे राष्ट्राध्यक्ष आसिफ अली झरदारी यांनी या अपघातावर शोक व्यक्त केला असून मानवी तस्करी रोखण्यासाठी पावले उचलण्याबाबत बोलले आहे. दरम्यान, पंतप्रधान शहबाज शरीफ यांनी अधिकाऱ्यांकडून घटनेचा अहवाल मागितला आणि मानवी तस्करीच्या घृणास्पद कृत्यामध्ये सहभागी असलेल्यांवर कठोर कारवाई केली जाईल असे सांगितले.
एक दिवसापूर्वी बोट बुडाल्याने 36 जणांना वाचवण्यात यश
पाकिस्तानच्या परराष्ट्र मंत्रालयाने एका निवेदनात म्हटले आहे की, मोरोक्कोमधील दूतावास स्थानिक अधिकाऱ्यांच्या संपर्कात आहे. मंत्रालयाने एका निवेदनात म्हटले आहे की, "रबत (मोरोक्को) मधील आमच्या दूतावासाने आम्हाला कळवले आहे की मॉरिटानियाहून निघालेल्या अनेक पाकिस्तानी नागरिकांसह 80 प्रवाशांना घेऊन जाणारी बोट मोरोक्कोच्या डाखला बंदराजवळ उलटली आहे." पाकिस्तानींसह अनेक वाचलेले दखलाजवळच्या छावणीत मुक्कामी आहेत. बोट उलटण्याच्या घटनेच्या एक दिवस आधी असाच अपघात घडला होता. मोरक्कनच्या अधिकाऱ्यांनी एका दिवसापूर्वीच एका बोटीतून 36 जणांची सुटका केली होती. ही बोट 2 जानेवारी रोजी 86 प्रवासी घेऊन मॉरिशसहून निघाली होती. या स्थलांतरितांमध्ये 66 पाकिस्तानींचाही समावेश आहे. वॉकिंग बॉर्डर्सच्या सीईओने सोशल मीडियावर माहिती दिली आहे की बुडालेल्यांपैकी 44 लोक पाकिस्तानचे आहेत.
2024 मध्ये युरोपला जाताना 10 हजारांहून अधिक लोकांचा मृत्यू
दरवर्षी लाखो पाकिस्तानी चांगल्या जीवनाच्या शोधात युरोपात स्थलांतरित होतात. यापैकी बहुतेक लोक बेकायदेशीर पद्धती म्हणजेच डंकी मार्गाचा अवलंब करतात. स्थलांतरितांवर काम करणाऱ्या Frontex एजन्सीनुसार, गेल्या वर्षी 2.4 लाखांहून अधिक लोक कोणत्याही कागदपत्रांशिवाय युरोपमध्ये प्रवेश करण्यात यशस्वी झाले. वॉकिंग बॉर्डर्स या दुसऱ्या एजन्सीने सांगितले की 2024 पर्यंत स्पेनमध्ये पोहोचण्याच्या प्रयत्नात 10,457 लोकांचा मृत्यू झाला. मॉरिटानिया आणि सेनेगल सारख्या पश्चिम आफ्रिकन देशांमधून स्पेनच्या कॅनरी बेटांवर प्रवास करताना त्यापैकी बहुतेकांचा मृत्यू झाला.
इतर महत्वाच्या बातम्या
महत्त्वाच्या बातम्या
