Chhatrapati Shivaji Maharaj : मॉरिशसमध्ये शिवछत्रपतींचा जयजयकार , छत्रपती शिवाजी महाराजांच्या 12 फूट उंचीच्या पुतळ्याचे अनावरण
Mauritius : छत्रपती शिवाजी महाराज यांच्या 12 फूट उंचीच्या अश्वारूढ पुतळ्याचे मॉरिशिसच्या मोका येथे अनावरण करण्यात आलंय.
Mauritius Chhatrapati Shivaji Maharaj : अखंड हिंदुस्तानाचे दैवत छत्रपती शिवाजी महाराज यांच्या 12 फूट उंचीच्या अश्वारूढ पुतळ्याचे मॉरिशसच्या मोका येथे अनावरण करण्यात आलंय. आज मॉरिशस पंतप्रधान प्रविंदकुमार जगन्नाथ (Pravind Kumar Jugnauth) आणि महाराष्ट्राचे उपमुख्यमंत्री देवेंद्र फडणवीस (Devendra Fadnavis) यांनी अनावरण केलं. छत्रपती शिवाजी महाराजांच्या जयजयकाराने संपूर्ण परिसर दुमदुमला होता.
मॉरिशसमधील मराठी मंडली फेडरेशनला मोठा निधी सरकारकडून मंजूर करण्यात आला. महाराष्ट्र भवनाच्या विस्तारासाठी 44 दशलक्ष मॉरिशियस रुपये अर्थात भारतीय चलनाचे 8 कोटी रुपये देण्याचा निर्णय मुख्यमंत्री एकनाथ शिंदे (Eknath Shinde) यांनी घेतला. या निर्णयाची घोषणा यावेळी उपमुख्यमंत्री देवेंद्र फडणवीस यांनी केली. मॉरिशसमधील 10 विद्यार्थ्यांना शिष्यवृत्ती देण्यात येईल, असंही त्यांनी जाहीर केलंय. मॉरिशसमधील मराठी आणि महाराष्ट्रीयन बांधवांना राज्यासोबत सतत संपर्कात राहता यावे, यासाठी एक कक्ष स्थापन करण्यात येईल, असंही त्यांनी घोषित केले.
अपार उत्साहात आणि संपूर्णपणे मराठी प्रतिबिंब असलेल्या या दिमाखदार सोहळ्यात मॉरिशसचे परराष्ट्र व्यवहार मंत्री ॲलन गानू (Alan Ganoo) इतर मंत्री, मॉरिशसमधील भारताच्या उच्चायुक्त नंदिनी सिंगला (Nandini Singala) मॉरिशस मराठी मंडली फेडरेशनचे अध्यक्ष आसंत गोविंद हे प्रामुख्याने उपस्थित होते. मॉरिशसमधील मराठी भगिनी आणि बांधव पारंपारिक पोषाखात या कार्यक्रमाला मोठ्या संख्येने उपस्थित होते. मॉरिशसमध्ये आपल्या शिवरायांचा सोहळा दिमाखदार पद्धतीने पार पडणं ही प्रत्येक माहाराष्ट्राच्या नागरिकासाठी आनंदाची बाब ठरली.
पाहा व्हिडीओ:
View this post on Instagram
देवेंद्र फडणवीस यांनी अशाप्रकाराचा भारताबाहेर केलेला हा चौथा कार्यक्रम आहे. यापूर्वी लंडनमधील भारतरत्न डॉ. बाबासाहेब आंबेडकर (Dr Babasaheb Ambedkar) यांचे स्मारक, जपानच्या कोयासन विद्यापीठात डॉ. बाबासाहेब आंबेडकर यांचा पुतळा तसंच रशियात लोकशाहिर अण्णाभाऊ साठे (Annabhau Sathe) यांच्या पुतळ्याचे लोकार्पण त्यांनी केले होते आणि आज हा कार्यक्रम झाला. या कार्यक्रमादरम्यान अनेक सांस्कृतिक कार्यक्रमसुद्धा सादर करण्यात आले. यात गोंधळ, शेतकरी नृत्य, पोवाडा, इत्यादी मराठी प्रकारांचा समावेश होता.
महाराष्ट्रातील नागरिकांसाठी आजचा दिवस अतिशय भावनात्मक दिवस
याप्रसंगी बोलताना उपमुख्यमंत्री देवेंद्र फडणवीस म्हणाले की, भारतातील विशेषत: महाराष्ट्रातील नागरिकांसाठी आजचा दिवस अतिशय भावनात्मक दिवस आहे. आमचे आराध्यदैवत छत्रपती शिवाजी महाराज यांचा पुतळा येथे उभारण्यात आला, याबद्दल मी मॉरिशसच्या पंतप्रधान आणि येथील मराठी समुदायाचा आभारी आहे. आमचे मुख्यमंत्री एकनाथ शिंदे आणि 12 कोटी महाराष्ट्रीयन जनतेच्या वतीने मी आपले आभार मानतो. आम्ही अनेक राजे पाहिले पण छत्रपती शिवाजी महाराज यांची दूरदृष्टी, शौर्य, साहस अन्य कुणामध्ये नव्हते. म्हणूनच त्यांना 'श्रीमंत योगी' म्हणतात. जलसंवर्धन, समुद्री सामर्थ्य, किल्ले निर्मिती, प्रबंधन, अर्थव्यवस्था, कायदा-सुव्यवस्था इत्यादी क्षेत्रातील त्यांचे सामर्थ्य आणि चातुर्य आजही तितकेच मार्गदर्शक आहे. या पुतळ्याच्या उदघाटनासाठी 5000 कि.मी. दूर तुम्ही मला निमंत्रित केले आणि हे भाग्य मला लाभले, हे मी माझे पूर्वपुण्‍य समजतो. महाराजांनी आपल्याला 'महाराष्ट्र धर्म' शिकविला. देव-देश आणि धर्मासाठी जगण्याची शपथ वयाच्या 14व्या वर्षी होणारे आमचे हे आदर्श राजे आहेत. भारतीयांच्या मनामनात वीरतेचे बीजारोपण करण्याचे काम महाराजांनी केले. मी त्यांना कोटी कोटी वंदन करतो. देवेंद्र फडणवीस यांनी केलेल्या विविध घोषणांचे मॉरिशसच्या पंतप्रधानांनी यावेळी स्वागत केले आणि त्यांनीही यावेळी छत्रपती शिवाजी महाराजांच्या कार्याचा गुणगौरव करणारे मनोगत व्यक्त केले.
महत्त्वाच्या बातम्या
ट्रेंडिंग न्यूज
