Anganewadi Jatra 2023 : कोकणातील आंगणेवाडी जत्रेची तारीख ठरली, देवीला कौल लावून ठरवली जाते जत्रेची तारीख
Anganewadi Jatra 2023 : महाराष्ट्रातीलच नव्हे तर देश-परदेशात कोकणातील ज्या एका जत्रेचं आकर्षण आहे ती म्हणजे आंगणेवाडीची जत्रा. श्री भराडी देवीचा वार्षिकोत्सव शनिवार 4 फेब्रुवारी 2023 रोजी होणार आहे.
Anganewadi Jatra 2023 : कोकणातील (Konkan) प्रति पंढरपूर म्हणून ओळख असलेलं आणि नवसाला पावणारी अशी ख्याती सर्वदूर पसरलेल्या लाखो भाविकांचे श्रद्धास्थान असलेल्या सिंधुदुर्ग (Sindhudurg) जिल्ह्यातील मालवण तालुक्यातील मसुरे गावच्या आंगणेवाडी येथील श्री भराडी देवीचा (Bharadi Devi) वार्षिकोत्सव शनिवार 4 फेब्रुवारी 2023 रोजी होणार आहे. देवीचा कौल घेऊन देवीच्या यात्रेची तारीख निश्चित करण्यात आली आहे.
महाराष्ट्रातीलच नव्हे तर देश-परदेशात कोकणातील ज्या एका जत्रेचं आकर्षण आहे ती म्हणजे आंगणेवाडीची जत्रा (Anganewadi Jatra). दरवर्षी लाखो भाविकांच्या गर्दीमध्ये मोठ्या उत्साहात या देवीची जत्रा रंगते. यंदा देखील तसेच मालवण मसुरे गावच्या आंगणेवाडीच्या भराडी देवीच्या दर्शनाला मोठ्या उत्साहाने भाविक येणार आहेत. अवघ्या दीड दिवसाच्या या यात्रेमध्ये सहभागी होण्यासाठी अनेक भाविक उत्सुक असतात. मग यात सामान्य नागरिकांपासून अनेक प्रथितयश कलाकार आणि राजकारणी मंडळी हमखास भेट देतात.
नवसाला पावणारी भराडी देवी
मालवण तालुक्यातील मसुरे एक गाव आहे. या गावात आंगणेवाडी नावाची वाडी असून या वाडीत 'भराडी देवी' विराजमान आहे. भरडावर देवी प्रकट झाली म्हणून या देवीचं नाव 'भराडी देवी' असं ठेवण्यात आलं आहे. भराड म्हणजे माळरान. या देवीच्या आजूबाजूचा परिसर हा माळरान आहे म्हणूनच या देवीला भराडी देवी असं नाव पडलं.
मसुरे गावच्या या आंगणेवाडीच्या या वाडीत केवळ आंगणे कुटुंबीयांची ही देवी आहे. तसा फलक आंगणे कुटुंबीयांचं खाजगी मंदिर म्हणून फलक लावला आहे. मात्र नवसाला पावणारी देवी अशी ख्याती असल्याने देवीचं सर्वांसाठी दर्शन खुले असते. भाविकांच्या गर्दी आणि श्रद्धेसाठी ते इतर सर्व भाविकांना खुले असते. गाऱ्हाणं आणि नवस बोलून अनेक भाविक आपल्या मनोकामना पूर्ण व्हाव्यात यासाठी भराडीदेवीचं दर्शन घेतात.
दरवर्षी सुमारे 5 ते 7 लाख भाविक भराडी देवीच्या दर्शनासाठी केवळ दीड दिवसांच्या जत्रेमध्ये सहभागी होतात. आंगणेवाडीच्या भराडी देवीचा नैवेद्य खास असतो. आंगणे कुटुंबियांच्या माहेरवाशिणी तो अबोल राहून करतात. या जत्रेमध्ये सहभागी झालेल्या प्रत्येक भाविकाला त्याचा लाभ घेता येतो. साऱ्यांसाठी केवळ या आंगणेवाडीच्या महिला प्रसाद बनवतात.
धार्मिक महत्त्वासोबतच आंगणेवाडीच्या भराडीदेवी यात्रेमध्ये सांस्कृतिक सोहळा देखील रंगतो. आंगणे ग्रामस्थ एक नाटक करतात त्याला मांडावरचं नाटक म्हणतात. मिरजेहून गोंधळी येतात ते देवीसमोर गोंधळ मांडतात. दशावतार असतो. अनेक राजकारणी मंडळी भराडी देवीच्या दर्शनाला येतात.
भराडी देवीची यात्रेला कसं जाल?
कणकवली, कुडाळ रेल्वे स्टेशनपासून डेपोपर्यंत जाण्यासाठी शेअर रिक्षाचा पर्याय उपलब्ध आहे. या दोन्ही बस डेपोतून आंगणेवाडीला जाण्यासाठी दर अर्ध्या तासाने बसेस असतात. आंगणेवाडीपर्यंत एसटीच्या तिकीटाचा दर अगदी माफक ठेवण्यात येतो. जर तुम्ही स्वतःच्या वाहनाने प्रवास करणार असाल तर मुंबई गोवा राष्ट्रीय महामार्गावरुन कुडाळ, कसाल, कणकवली या मार्गे आंगणेवाडीपर्यंतचा पुढचा प्रवास करता येईल.
VIDEO : Anganewadi : आंगणेवाडीच्या भराडी देवीची यात्रा 4 फेब्रुवारीला संपन्न होणार
महत्त्वाच्या बातम्या
