अनैतिक संबंधातून गरोदर, 18 वर्षीय तरुणीची ओढणीने गळा आवळून हत्या, विट भट्टी मालकाला बेड्या
Gondia Pregnant Girl Murder : आरोपी हा विट भट्टी मालक असून मृत तरुणी ही त्या ठिकाणी कामाला होती. या दोघांमध्ये अनैतिक संबंध प्रस्थापित झाल्याने तरुणी गरोदर राहिली होती.
गोंदिया : अनैतिक संबंधातून गरोदर राहिलेल्या 18 वर्षीय तरुणीची ओढणीने गळा आवळून हत्या केल्याची घटना गोंदियाच्या गोरेगाव तालुक्यातील बबई-देऊटोला शेतशिवारात घडली. या प्रकरणात पोलिसांनी शकील मुस्तफा सिद्दीकी (38) रा. मामा चौक गोंदिया, याला अटक केली आहे.
सोमवारी पहाटे गोरेगांव तालुक्यातील बबई-देऊटोला शेतशिवारामध्ये एक महिलेचा मृतदेह अर्धवट जळलेल्या अवस्थेत आढळला होता. याप्रकरणी गोरेगाव पोलिसांनी तपासाची चक्र फिरवत आरोपीला अटक केली. शकील मुस्तफा सिद्दीकी हा वीट भट्टीचा मालक आहे. मृतक तरुणी ही आरोपीच्या विटभट्टीवर काम करत असे. दरम्यान, आरोपीने तरुणीसोबत अनैतिक संबंध प्रस्थापित केले. त्यातून मृतक तरुणी ही गरोदर राहिली.
ओढणीने गळा आवळून हत्या केली
तरुणी गरोदर असल्याने ती आरोपी सोबत राहण्यासाठी इच्छुक होती. मात्र, आरोपीला हे मान्य नव्हते. त्यामुळेच त्या दोघांमध्ये वाद झाला. शेवटी मागे लागलेल्या त्या तरुणीपासून सुटका करुन घेण्यासाठी आरोपीने तिला बबई-देऊटोला शेत-शिवारात आणले. त्या ठिकाणी त्याने ओढणीने गळा आवळून तरुणीची हत्या केली. पुरावा नष्ट करण्याच्या उद्देशाने त्याने मृतदेह जाळण्याचा प्रयत्न केला.
गोंदियाचे पोलीस अधीक्षक गोरख भामरे यांनी घटनास्थळाची पाहणी केल्यानंतर विविध पथकं आरोपीच्या शोधात पाठवण्यात आले होते. अखेर गोरेगाव पोलिस आणि स्थानिक गुन्हे शाखेच्या पथकाने आरोपीला ताब्यात घेतलं. घटनेच्या पुढील तपास गोंदिया पोलिस अधीक्षक गोरख भामरे, उपविभागीय पोलीस अधिकारी प्रमोद मडामे यांच्या मार्गदर्शनाखाली गोरेगाव पोलिस स्टेशनचे पोलीस निरीक्षक अजय भुसारी करत आहेत.
ही बातमी वाचा:
महत्त्वाच्या बातम्या
