SSC : दहावीचा पेपर सहावीच्या मुलींकडून तपासण्याचं प्रकरण, शिक्षणाधिकाऱ्यांकडे तक्रार करणाऱ्यावरच निलंबनाची कारवाई 

Phaltan SSC Paper Check News : ज्याने या प्रकरणाची तक्रार शिक्षणाधिकाऱ्यांकडे केली, त्या शाळेच्या कर्मचाऱ्यावरच निलंबनाची कारवाई संस्थेने केल्याचा प्रकार समोर आला आहे. 

Phaltan SSC Paper Check News

Source : abp majha

सातारा : दहावीतील विद्यार्थ्यांचे पेपर सहावीतल्या विद्यार्थ्यांनी तपासण्याचा प्रकार ज्याने समोर आणले त्या मंगेश अभंग याच्यावर शाळेने चार महिन्यांच्या निलंबनाची कारवाई केल्याचा धक्कादायक प्रकार समोर आला आहे. फलटण तालुक्यातील विडणी येथील उत्तरेश्वर हायस्कूलमध्ये (Phaltan SSC Paper News) हा प्रकार घडला होता. मंगेश अभंग हे या शाळेत शिपाई या पदावर कार्यरत असून त्यांच्यावर आता निलंबनाची कारवाई करण्यात आली आहे. 

फलटण तालुक्यातील विडणी येथील उत्तरेश्वर हायस्कूलमध्ये एका शिक्षकाने सहावीच्या विद्यार्थिनींच्या मदतीने दहावीचे पेपर तपासले होते. तो प्रकार समोर आणणाऱ्याच्या विरोधात आता कारवाईचा बडगा उगारण्यात आला आहे. माध्यमांना चुकीची माहिती देऊन शाळेची बदनामी केल्याचा ठपका ठेवत मंगेश अभंग यांना निलंबित करण्यात आलं आहे. 

काय म्हटलंय संस्थेने त्यांचा पत्रात? 

वैभव शेंडे हे उत्तरपत्रिका तपासण्याचं काम करत असताना, सदर तपासणीसाठी 6 वीच्या मुलींची मदत घेत असल्याचा व्हिडीओ काढत, तसेच मख्याध्यापकांची कोणतीही पूर्वपरवानगी न घेता तो व्हिडीओ माध्यमांना पुरवण्यात आला. प्रत्यक्षात सदर शिक्षकाने संबंधित मुलींना मोकळ्या जागी रेषा मारण्याचं काम दिलं होतं. तुम्ही माध्यमांना दिशाभूल करणारी माहिती दिली. त्यानुसार आपल्यावर चार महिने निलंबनाची कारवाई करण्यात येत आहे. 

काय आहे प्रकरण?

दहावीच्या परीक्षेशी संबंधित एक धक्कादायक प्रकार सातारा जिल्ह्यात समोर आला. फलटण (Phaltan) तालुक्यातील विडणी गावातील उत्तरेश्वर हायस्कूलमध्ये शिक्षकानं थेट सहावीच्या दोन विद्यार्थिनींकडून दहावीच्या पेपरची तपासणी करून घेतल्याचा आरोप करण्यात आला. वैभव शेंडे असं या शिक्षकाचं नाव असून दहावीचा मराठी विषयाचा पेपर सहावीच्या विद्यार्थिनींच्या मदतीनं तपासला जात असल्याचा आरोप झाला. या संदर्भातील CCTV फुटेजही समोर आलं आहे. परंतु, त्या मुली पेपर तपासत नव्हत्या तर रिकाम्या पेपरवर रेषा मारत असल्याचा दावा शाळेने केला. 

या प्रकरणी ज्यांच्यावर निलंबनाची कारवाई करण्यात आली ते मंगेश अभंग म्हणाले की, "26 फेब्रुवारी रोजी मराठीचा पेपर हा सहावीच्या विद्यार्थिनींकडून तपासण्यात आला होता. सलग दोन दिवस हा प्रकार सुरू होता. हा प्रकार मी संस्थेच्या सचिवांच्या कानावर घातला. त्यानंतर ज्या शिक्षकांविरोधात मी तक्रार केली होती, त्यांनी मला दमदाटी केली. यानंतर मी शिक्षणाधिकाऱ्यांकडे याची तक्रार केली.त्यावर मला संस्थेने कारणे दाखवा नोटीस बजावली. संस्थेतील सीसीटीव्ही तुम्ही सार्वजनिक केले असं सांगत मला नोटीस बजावण्यात आली. यामध्ये माझ्याकडून संस्थेची बदनामी केल्याचा ठपका ठेवण्यात आला."

मंगेश अभंग म्हणाले की, "ज्या शिक्षकाने हे सर्व केलं त्याच्याविरोधात कोणतीही कारवाई करण्यात आली नाही. मात्र माझ्यावर कारवाई करण्यात आली. संस्थेच्या सचिवांचा मुलगा दहावीत आहे, त्याला मदत करण्यासंबंधी शिक्षकाकडून काहीतरी भूमिका घेतली गेली असावी म्हणून त्याच्यावर कारवाई न करता आपल्यावर कारवाई करण्यात आली असेल."

ही बातमी वाचा: