डोक्यावर केळी, हातात पाटी; पुण्याचा केळेवाला सोशल मीडियावर व्हायरल
Pune Latest News : रस्त्याच्या कडेला मोठ्या आवाजात ‘महागाईच्या काळात स्वस्ताईची कमाल, केळी घ्या 20 रूपये डझन’ असा आवाज ऐकू आला तर नवल नाही.
Pune Latest News : बदलत्या काळानुसार वस्तू विकण्याच्या पद्धतीही बदलत आहेत.. अधिकाधिक ग्राहक आपल्या दुकानात यावेत,दुकानातील वस्तू विकल्या जाव्यात यासाठी दुकान मालक वेगवेगळ्या पद्धतीचा अवलंब करताना दिसत आहेत. विशेषतः फळं आणि भाज्या विकण्यासाठी त्या विक्रेत्यांकडून वेगवेगळ्या पद्धतीचा अवलंब केला जातोय. अनेकदातर त्यांची विक्री करण्याची स्टाईल बघून येणारे जाणारे लोक थांबतात, त्याचं स्किल पाहून अचंबित होतात. लॉकडाऊनच्या काळात अशाच एका भाजीविक्रेत्याचा व्हिडीओ तुफान व्हायरल झाला होता. त्यानंतर आता पुण्यातील केळी विक्रेत्याच्या एक व्हिडिओ असाच व्हायरल होतोय. हा व्हिडिओ पाहिल्यानंतर तुम्ही हसू रोखूच शकणार नाहीत.
रस्त्याच्या कडेला मोठ्या आवाजात ‘महागाईच्या काळात स्वस्ताईची कमाल, केळी घ्या 20 रूपये डझन’ असा आवाज ऐकू आला तर नवल नाही. ग्राहक पटकन केळी घेणारच. व्यवसाय करण्यासाठी ही शक्कल लढवून बेरोजगारीवर मात करण्याची कमाल केलीय एका तरूणाने. त्याचे नाव नामदेव माने असे आहे. नामदेव मानेला पहिल्या लॉकडाऊनमध्ये नोकरी गमवावी लागली. त्यामुळे बेरोजगारीचे ओझे न वाहता रस्त्यावर बसून केळी विकण्याचा व्यवसाय त्याने सुरू केला. तो दिघी परिसरात व्यवसाय करत आहे.
कोरोनामुळे पहिल्या लॉकडाऊनमध्ये हजारो-लाखो लोकांचा रोजगार गेला. त्यामुळे काहींनी हताश होऊन जीवन संपविण्याचा निर्णय घेतला, तर काहींनी जिद्दीने नवीन काहीतरी करून जगण्याचा प्रयत्न केला. अशीच जिद्द नामदेव माने याने दाखवली आहे. तो दिघी परिसरातील एका कंपनीत कामाला होता. परंतु, लॉकडाऊन झाले आणि त्याची नोकरी गेली. त्यामुळे आता काय करावे? असा प्रश्न त्याच्यासमोर होता. त्यातून त्याने रस्त्यावर केळी विकण्याचा व्यवसाय सुरू केला. लॉकडाऊन काळात भाजीपाला आणि फळे विकण्यासाठी परवानगी होती. त्यामुळे त्याने केळी विकायला सुरुवात केली. परंतु, ग्राहक येत नसत. मग त्याने हातात केळी घेऊन नृत्य करून ग्राहकांना आकर्षित करणे सुरू केले. त्यामुळे त्याचा व्यवसाय होऊ लागला. पण इतर लोकांना त्याचे वागणे खटकू लागले. त्यामुळे काहींनी त्याच्याविरोधात तक्रार केली. शेवटी त्याने रस्त्याच्या बाजूला एका ठिकाणी उभे राहून व्यवसाय सुरू केला.
नामदेवने त्याच्या आवाजात एक केळी विक्रीचे गाणे रेकॉर्ड करून रस्त्यावर लावले आहे. त्यामुळे त्याला स्वत:ला ओरडावे लागत नाही. तो संपूर्ण तोंड झाकून, गळ्यामध्ये केळीची किंमत लिहिलेली पाटी घालून डोक्यावर, हातात केळी घेतो. आपल्या या अनोख्या व्यवसायाबद्दल अधिक माहिती देताना नामदेव म्हणतो. ''दररोज केळी विकून सुमारे चारशे रूपये मिळतात. पूर्वीच्या लॉकडाऊनने खूप शिकवले आहे, आता पुन्हा लॉकडाऊन नको अशी अपेक्षा व्यक्त करत आहेत.
महत्त्वाच्या बातम्या
