Pune Porsche Case : पुणे हादरवून टाकणाऱ्या पोर्श हिट अँड रन प्रकरणात 'ते' दोन पोलिस अधिकारी बडतर्फ होणार?
Pune Porsche Case : पुणे हादरवून टाकणाऱ्या पोर्श हिट अँड रन प्रकरणात मोठी अपडेट, 'ते' दोघे आढळले दोषी
पुणे: पुण्यातील कल्याणीनगर भागातील पोर्शे अपघात (Pune Porsche Case) प्रकरणाची राज्यासह देशभरात मोठी चर्चा झाली होती. या पोर्शे कार अपघात (Pune Porsche Case) प्रकरणात दोषी आढळलेल्या पुणे पोलीस दलातील दोन पोलीस अधिकाऱ्यांना निलंबित करण्यात आलं होतं त्यानंतर आणि आता हे दोन पोलीस अधिकारी पोलीस सेवेतूनच बडतर्फ होण्याची शक्यता आहे. त्याचं कारण म्हणजे या दोन अधिकाऱ्यांना पोलीस दलातून बडतर्फ करण्याचा प्रस्ताव पुणे पोलिसांनी 'पोलीस महासंचालक' कार्यालयाकडे पाठवला असल्याची माहिती समोर आली आहे. पुण्याचे पोलीस आयुक्त अमितेश कुमार यांनी या संदर्भात माहिती दिली आहे. (Pune Porsche Case)
पोलीस निरीक्षक राहुल जगदाळे तसेच सहाय्यक निरीक्षक विश्वास तोडकरी अशी या दोन पोलिस अधिकाऱ्यांची नावे आहेत. कर्तव्यात कसूर केल्याचा ठपका ठेवत येरवडा पोलीस ठाण्याचे तत्कालीन गुन्हे निरीक्षक राहुल जगदाळे आणि रात्रपाळीवर कर्तव्यास असलेले सहाय्यक निरीक्षक विश्वनाथ तोडकरी यांना तेव्हा निलंबित करण्यात आलं होतं. त्यांची विभागीय चौकशी करण्यात आली होती. विभागीय चौकशी पुर्ण झाल्यानंतर त्यामध्ये हे दोघे दोषी आढळले. त्यानंतर आता त्यांना पोलीस खात्यातून बडतर्फ करण्याचा प्रस्ताव पोलीस महासंचालक कार्यालयाकडे पाठवला असल्याची माहिती पोलीस आयुक्त अमितेश कुमार यांनी दिली आहे.
प्रकरण काय?
कल्याणीनगरमध्ये 19 मे २०२४ च्या मध्यरात्री पबमधून पार्टी करून परत जात असताना अल्पवयीन कार चालकाने भरधाव वेगात कार चालवत एका दुचाकीला पाठीमागून जोरदार धडक दिली होती. या अपघातात दुचाकी वरील तरुण-तरुणीचा जागीच मृत्यू झाला होता. त्यानंतर अपघातास कारणीभूत असलेल्या बड्या बिल्डरच्या मुलाला वाचवण्यासाठी नाट्यमय घडामोडी घडल्या होत्या. राजकीय हस्तक्षेप आणि पैशाचा वापर करून अल्पवयीन आरोपीला वाचवण्यासाठी सर्वच यंत्रणा कामाला लागल्या होत्या. या संपूर्ण प्रकरणात पोलिसांनी तीन वेगवेगळे गुन्हे दाखल केले आहेत.
पोर्शे कार अपघात प्रकरणात अल्पवयीन मुलाचे आई-वडिल, ससूनचे दोन डॉक्टर यांच्यासह दहा जणांना अटक करण्यात आली. दरम्यान, हे प्रकरण फास्ट ट्रॅक कोर्टात चालवण्याचा पुणे पोलिसांचा प्रयत्न आहे. पोर्शे अपघात प्रकरणामध्ये अल्पवयीन मुलाने दुचाकीवरून चाललेल्या तरूण आणि तरूणीला धडक दिली होती. या अपघातात दोघांचा जागीच मृत्यू झाला होता. या प्रकरणामध्ये पुण्यातील प्रसिद्ध बिल्डर अग्रवाल यांच्या नातवाचे यात नाव समोर आले होते. आरोपी अल्पवयीन मुलाला शिक्षा म्हणून निबंध लिहण्याचे आदेश दिले त्यानंतर पुणेकरांनी संताप व्यक्त केला होता. अपघाताचा व्हिडीओ समोर आल्यावर आणि त्याला मिळालेली शिक्षा पाहून सर्वांनाच राग अनावर झाला. त्यानंतर पोलिसांनी संपूर्ण प्रकरणात कारवाई केली होती. बड्या बापाच्या मुलाला शिक्षा मिळाली होती.
महत्त्वाच्या बातम्या
