Deenanath Mangeshkar Hospital: दीनानाथ मंगेशकर रुग्णालयात फक्त श्रीमंतांना पायघड्या, गरिबांना थारा नाही? महात्मा फुले योजनेचा लाभ देण्यास नकार
Pune Deenanath Mangeshkar Hospital: : दीनानाथ मंगेशकर रुग्णालयाची आणखी एक महत्त्वाची माहिती समोर आली आहे.एवढ्या मोठ्या हॉस्पिटलमध्ये महात्मा फुले योजनेचा लाभ मिळत नाही.
पुणे: पुण्यातील नामांकित दीनानाथ मंगेशकर रुग्णालयात (Dinanath Mangeshkar Hospital) प्रशासनाच्या मुजोरपणामुळे एका गर्भवती महिलेचा मृत्यू झाला आहे. रूग्णालयाने उपचारांसाठी 10 लाख रूपये भरण्याची मागणी केली, मात्र त्यांचे कुटुंबीय पैसे जुळवाजुळव करतो, तोपर्यंत तीन लाख रूपये भरतो सांगत अतानाही उपचार सुरू केले नाहीत. त्यानंतर वेळेत उपचार न मिळाल्याने त्या गर्भवती तनिषा भिसे नावाच्या महिलेचा मृत्यू झाला. त्यानंतर आता दीनानाथ मंगेशकर रुग्णालयाचे अनेक कारनामे आणि गोष्टी बाहेर येत आहेत. दीनानाथ मंगेशकर (Dinanath Mangeshkar Hospital) रुग्णालयाची आणखी एक महत्त्वाची माहिती समोर आली आहे.एवढ्या मोठ्या हॉस्पिटलमध्ये महात्मा फुले योजनेचा लाभ मिळत नाही. (Dinanath Mangeshkar Hospital)
दीनानाथ मंगेशकर रुग्णालयात (Dinanath Mangeshkar Hospital) महात्मा फुले आरोग्य योजनेचा लाभच मिळत नसल्याची माहिती समोर आली आहे. मंगेशकर हॉस्पिटलने एका रुग्णाला चक्क पेपरवर महात्मा फुले योजनेचा लाभ मिळत नाही असं लिहून दिलं आहे. परशुराम हिंदू सेवा संघाने यावरती आक्षेप घेतला आहे. तर सरकारने सर्वसामान्य आणि गोरगरिबांसाठी घोषित केलेल्या योजनेच काय? असा सवाल आता उपस्थित होत आहे. एवढ्या मोठ्या हॉस्पिटलमध्ये महात्मा फुले योजनेचा लाभ मिळत नाही. या योजनेचा मुख्य उद्देश राज्यात गरीब आणि गरजू लोकांना वैद्यकीय सुविधा उपलब्ध करून देणे आहे, जेणेकरून ते आर्थिक अडचणींमुळे उपचारांपासून वंचित राहणार नाहीत. या योजनेत, रुग्णालयात दाखल होणे आवश्यक असलेल्या गंभीर आजारांसाठी लाभार्थ्यांना कॅशलेस आरोग्य सेवा दिली जाते.
महात्मा ज्योतिबा फुले जन आरोग्य योजना काय?
महात्मा ज्योतिबा फुले जन आरोग्य योजना (MJPJAY) ही महाराष्ट्र सरकारची आरोग्य योजना आहे, ज्याचा उद्देश कमी उत्पन्न असलेल्या कुटुंबांना परवडणारी आरोग्य सेवा देणे हा आहे. 2 जुलै 2012 रोजी ही योजना सुरू झालेली आहे. समाजातील आर्थिकदृष्ट्या कमकुवत घटकांना व्यापक वैद्यकीय सहाय्य देते. महात्मा ज्योतिबा फुले जन आरोग्य योजना (MJPJAY) महाराष्ट्रातील आर्थिकदृष्ट्या वंचित गटांना आवश्यक आरोग्यसेवा कव्हर प्रदान करते. पात्रतेमध्ये पिवळे, अंत्योदय अन्न योजना (AAY), अन्नपूर्णा किंवा केशरी रेशन कार्ड (श्रेणी A) असलेले कुटुंबे; पांढरे रेशन कार्ड (श्रेणी B) असलेले १४ संकटग्रस्त जिल्ह्यांतील शेतकरी; आणि अनाथाश्रमातील मुले, महिला कैदी आणि नोंदणीकृत बांधकाम कामगार (श्रेणी C) असे विविध लाभार्थी समाविष्ट आहेत.
रुग्णालयाने 27 कोटींचा कर थकवला
दीनानाथ मंगेशकर रुग्णालयाने महापालिकेचा तब्बल 27 कोटींचा मिळकतकर थकविल्याचे समोर आले आहे. दीनानाथ मंगेशकर रुग्णालयाने गेल्या सहा वर्षात एकही रुपयाचा कर भरला नसल्याची माहिती पुढे आले आहे. त्यामुळे महापालिकेचा तब्बल 27 कोटींचा मिळकत कर रुग्णालय प्रशासनाने थकविल्याचे समोर आले आहे. रुग्णालय चालविणाऱ्या लता मंगेशकर मेडिकल फाउंडेशनने 2019-20 पासून एकही रुपयांचा कर भरलेला नसल्याचे महापालिकेने दिलेल्या आकडेवारीवरून स्पष्ट झाले आहे. एकीकडे पैशांसाठी उपचार नाकारणाऱ्या या रुग्णालयाने महापालिकेचा गेल्या सहा वर्षांपासून तब्बल 27 कोटी 38 लाख 62 हजार 874 रुपयांच कर थकवला आहे. एकीकडे धर्मदाय रुग्णालयांना मिळकतकर सवलत असल्याचा दावा केला जात असला, तरी महापालिकेने मात्र लता मंगेशकर मेडिकल फाउंडेशनकडे 27 कोटींची थकबाकी दाखविली आहे.
महत्त्वाच्या बातम्या
