Pune Bypoll election : कसब्यात कॉंग्रेसचं कसं बा व्हायचं? बाळासाहेब दाभेकरांची बंडखोरी, उमेदवारी अर्ज भरणार
पुणे शहर काँग्रेसचे वरिष्ठ उपाध्यक्ष बाळासाहेब दाभेकर कसब्यातून उमेदवारी अर्ज भरणार असल्याची माहिती समोर आली आहे. उद्या कसबा विधानसभा मतदारसंघाच्या पोटनिवडणुकीचा उमेदवारी अर्ज दाखल करणार आहेत.
Pune Bypoll election : पुण्यात कसबा पोटनिवडणुकीच्या (Kasba Bypoll Election) उमेदवारीवरुन वातावरण तापलं आहे. एकीकडे टिळकांना उमेदवारी न दिल्याने हिंदू महासंघ पोटनिवडणुकीच्या रिंगणात उतरणार आहे. तर दुसरीकडे महाविकास आघाडीने रविंद्र धंगेकर यांना उमेदवार घोषित केल्याने कॉंग्रेसचे नेते बंडखोरी करण्याच्या तयारीत आहेत. पुणे शहर काँग्रेसचे वरिष्ठ उपाध्यक्ष बाळासाहेब दाभेकर कसब्यातून उमेदवारी अर्ज भरणार असल्याची माहिती समोर आली आहे. बाळासाहेब दाभेकर उद्या (मंगळवार 7 फेब्रुवारी 2023) सकाळी 10 वाजता कसबा विधानसभा मतदारसंघाच्या पोटनिवडणुकीचा उमेदवारी अर्ज दाखल करणार आहेत.
भाजपकडून आणि कॉंग्रेसकडून आज मोठ्या प्रमाणात शक्ती प्रदर्शन करत उमेदवारी अर्ज दाखल करण्यात आले. त्यामुळे उद्या दाभेकर कार्यकर्त्यासाहित दुचाकी वाहनांच्या रॅलीत सहभागी होणार आहेत. ही रॅली नारायण पेठेतील मोदी गणपती मंदिरापासून सुरू होणार आहे. तेथून पुढे केसरीवाडा गणपती, दगडूशेठ गणपती मंदिर मार्गे गणेश कला क्रीडा रंगमंचाच्या सभागृहाजवळ समाप्त होणार आहे. या रॅलीच्या सांगतेनंतर दाभेकर उमेदवारी अर्ज दाखल करणार आहेत.
कसबा पेठ विधानसभा मतदारसंघाच्या आमदार मुक्ता टिळक आणि चिंचवड विधानसभा मतदारसंघाचे आमदार लक्ष्मण जगताप यांच्या निधनामुळे रिक्त झालेल्या जागेवर पोटनिवडणूक जाहीर झाली आहे. निवडणुकीकरीता भाजपकडून आपले उमेदवार जाहीर करण्यात आले आहे. निवडणुकीकरीता भाजपाकडून कसबा पेठ विधानसभा मतदारसंघासाठी हेमंत रासने तर चिंचवड विधानसभा मतदारसंघासाठी आमदार लक्ष्मण जगताप यांच्या पत्नी अश्विनी जगताप यांना उमेदवारी जाहीर करण्यात आली आहे.
कसबा मतदार संघात हेमंत रासने यांना भाजपकडून उमेदवारी जाहीर झाल्यानंतर कसब्यात महाविकास आघाडीकडून उमेदवारी कोणाला दिली जाणार याकडे सर्वाचं लक्ष लागलं होतं. कसब्यासाठी महाविकास आघाडीकडून इच्छूक उमेदवारांनी मोठी यादी होती. त्यात राष्ट्रवादी आणि शिवसेनेनेदेखील या जागेवर दावा केला होता. मात्र कसबा मतदार संघात सुरुवातीपासून कॉंग्रेसचं मोठं वर्चस्व आहे. त्यामुळे महाविकास आघाडीकडून ही जागा काँग्रेसला दिली जाणार अशा चर्चा होत्या त्यात कसब्यात महाविकास आघाडीकडून नगरसेवक रवींद्र धंगेकर, कमल व्यवहारे आणि बाळासाहेब दाभेकर यांच्या नावाची चर्चा होती. मात्र रविंद्र धंगेकरांना महाविकास आघाडीकडून उमेदवार घोषित करण्यात आलं आहे. त्यांनी उमेदवारी अर्जदेखील दाखल केला आहे. त्यानंतर मागील अनेक वर्ष कॉंग्रेसमध्ये सक्रिय असलेले बाळासाहेब दाभेकरांनी बंडखोरी करण्याचा निर्णय घेतल्याची माहिती समोर आली आहे. यामुळे आता कॉंग्रेसमध्ये मोठी फूट पडणार असल्याचं चित्र आहे.
महत्त्वाच्या बातम्या
