lok sabha election Votting : वासुदेव आला रे, वासुदेव आला...; पिंपरी चिंचवडमध्ये वासुदेव करतायत मतदानासाठी जनजागृती
. लोकशाही टिकवण्यासाठी मतदान करणं गरजेचं आहे. हे सांगत अनेक ठिकाणी मतदानाचं महत्व पटवून दिलं जातं मात्र पिंपरी-चिंचडवडमध्ये थेट वासूदेव मतदानासाठी जनजागृती करत आहेत.
पुणे : निवडणुकीसाठी मतदान जागृती करण्यासाठी (lok sabha election Votting) निवडणूक आयोग अनेक प्रयत्न करत असतो नवनव्या जाहिराती करत असतात. त्यासोबतच अनेक गावागावात जाऊन नवी शक्कल लढवून मतदान करण्यासाठी जनजागृती करत असतात. लोकशाही टिकवण्यासाठी मतदान करणं गरजेचं आहे. हे सांगत अनेक ठिकाणी मतदानाचं महत्व पटवून दिलं जातं मात्र पिंपरी-चिंचडवडमध्ये थेट वासूदेव मतदानासाठी जनजागृती करत आहेत.
एकजुटीनं .. दुरदृष्टिनं चला गाजवू मैदान.., राष्ट्रहितासाठी करायचं मतदान.., लोकशाहीचा करायचा सन्मान..,100 टक्के हो करायचं मतदान.., लोकशाहीचा करायचा सन्मान.. हा वासुदेवांचा आवाज अलीकडे मावळ लोकसभा मतदार संघातील पिंपरी-चिंचवडमध्ये सकाळी घुमत असल्याचे दिसत आहे. निमित्त आहे लोकसभा निवडणुकीचे. अखिल भारतीय मराठी नाट्य परिषदेच्या पिंपरी - चिंचवड शाखेचे अध्यक्ष भाऊसाहेब भोईर यांच्या संकल्पनेतून शहराच्या विविध भागात ही मतदान जनजागृती होत आहे. राज्यात लोकसभा निवडणुकीच्या दोन टप्याचे मतदान पार पडले मात्र त्यामध्ये मतदानाची टक्केवारी कमी झालेली दिसते आहे, यामुळे आपल्या मावळ लोकसभा मतदार संघात मतदारांना मतदान करण्यास प्रेरणा देण्यासाठी अ. भा. नाट्य परिषदेच्या वतीने हा उपक्रम राबविण्यात येत असल्याचे भाऊसाहेब भोईर यांनी सांगितले.
मतदान जनजागृती करत असलेले वासुदेव हे नाट्याकर्मी नसून खरेखुरे वासुदेव आहेत. त्यांच्या मार्फत लोक गीतांच्या माध्यमातून ही जनजागृती करण्याचा आमचा प्रयत्न आहे. शहरातील नव मतदार असलेल्या तरुणाईने मतदानासाठी घराबाहेर पडावे, आपण मतदान केले नाही तर काय फरक पडतो? अशी भूमिका काही लोक घेत असतात त्यांनाही मतदान केंद्रापर्यंत जा, मतदान करून आपले कर्तव्य बजवावे असे आवाहन हे वासुदेव करत आहेत. शहरातील उद्याने, सोसायट्या आणि विविध भागात सकाळी 6 ते 10या वेळेत ही जनजागृती करण्यात येत आहे. या मतदान जनजागृती साठी वासुदेवांना मार्गदर्शन आणि त्यांच्या मार्गांचे नियोजन या नाट्य परिषदेच्या वतीने करण्यात येत आहे. त्यामुळे या वासुदेवांचं ऐकून मतदानासाठी नागरिक घराबाहेर पडतील का?, हे पाहणं महत्वाचं ठरणार आहे.
इतर महत्वाची बातमी-
राहुल गांधींची दुसरी उमेदवारी अखेर जाहीर, अमेठीतून नव्हे तर रायबरेलीतून लढवणार निवडणूक
महत्त्वाच्या बातम्या
ट्रेंडिंग न्यूज
