Tanaji sawant: येत्या निवडणुकीला सर्वधर्म समभाव; तानाजी सावंतांकडून एकला चलो रे चा नारा, महायुतीत उभी फूट

येत्या नगरपरिषद निवडणूक स्वतंत्र लढण्यासाठी कार्यकर्त्यांची मोर्चेबांधणी केली जात असून त्यांनी एकला चलो रे म्हणत कार्यकर्त्यांना शिवसेना स्वतंत्रपणे लढण्यास तयार असल्याचेही सांगितले.

tanaji sawant on election mahayuti

Source : Abp

धाराशिव: उद्धव ठाकरेंच्या धाराशिव (Dharashiv) जिल्हा दौऱ्यानंतर कार्यकर्त्यांना बळ देण्यासाठी माजी मंत्री तानाजी सावंत (Tanaji sawant) निवडणुकीच्या मैदानात उतरल्याचं पाहायला मिळत आहे. सावंत यांनी आजपासून दोन दिवस नगरपरिषद निवडणुकीचा आढावा घेण्यासाठी आपला दौरा सुरू केला. तत्पू्र्वी, सोनारी येथील भैरवनाथ साखर कारखान्यावर कार्यकर्त्यांसोबत बैठकीने दौऱ्याची सुरुवात केली. त्यानंतर, भूम येथील मेळाव्यात बोलताना त्यांनी महायुतीला घरचा अहेर दिला असून आपले दंड थोपटत एकला चलो रे चा नारा दिला आहे. आगामी निवडणुकीत सर्वधर्मसमभाव आणि विकास हाच आपला अजेंडा असेल, असेही त्यांनी म्हटले. तर, राष्ट्रवादी काँग्रेसवर (NCP) टीकाही केली.

तानाजी सावंत दोन दिवसाच्या दौऱ्यात मतदारसंघातील परंडा आणि भूम नगरपरिषदेचा आढावा घेणार आहेत, येत्या नगरपरिषद निवडणूक स्वतंत्र लढण्यासाठी कार्यकर्त्यांची मोर्चेबांधणी केली जात असून त्यांनी एकला चलो रे म्हणत कार्यकर्त्यांना शिवसेना स्वतंत्रपणे लढण्यास तयार असल्याचेही सांगितले. परंडा येथील मेळाव्यात बोलताना सांवत म्हणाले की, अंडर करंट वेगळे असतात. जे दिसतं ते वास्तव नसतं. जे चालतंय ते एक, आणि जे होतंय ते दुसरंच असतं. मतदारसंघाच्या विकासाची दिशा चुकली तर सरकारसमोर आव्हान उभं केल्याशिवाय स्वस्थ बसणार नाही, असा इशाराच महायुती सरकारला सावंत यांनी दिला.

एकला चलो रे चा नारा

तानाजी सावंत यांनी महायुतीच्या संख्याबळाकडे लक्ष वेधत इशाराच दिलाय. 234 आमदार आहेत म्हणतात… मग 2 असो किंवा 234 असो, अर्थ एकच आहे, माणसंच आहेत की, घाबरण्याचं काही कारण नाही, असे सावंत यांनी म्हटले. तसेच, येत्या निवडणुकीत सर्वधर्म समभाव, आपली एकी आणि आपला अजेंडा घेऊन जायचं. आपला अजेंडा कोणाला बदनाम करण्याचा नाही, आपला अजेंडा विकासाचा आहे", असं खळबळजनक वक्तव्य तानाजी सावंत यांनी परंड्यात बोलताना केले. 20 नगरसेवक आणि नगराध्यक्ष पद शिवसेना स्वबळावर लढणार असे सावंत यांनी म्हटले. त्यामुळे, परंड्यात शिवसेना विरुद्ध सर्वपक्षीय असा सामना रंगणार असल्याचं दिसून येत आहे. दरम्यान, एकीकडे पालकमंत्री प्रताप सरनाईक यांची मुंबईत महायुतीसाठी भाजपसोबत बैठक होत असताना दुसरीकडे तानाजी सावंत यांनी मतदारसंघात एकला चलो रे चा नारा दिलाय. त्यामुळे, नगर परिषद निवडणुकीच्या तोंडावर धाराशिवमध्ये महायुतीत वादाची ठिणगी पडली. सुरुवात तुम्ही केली, असे म्हणत मित्रपक्षांनी सावंत यांनी खुलं चॅलेंज दिलं आहे. तानाजी सावंत यांचे विरोधी उमेदवार राहुल मोटे अजित पवारांच्या राष्ट्रवादीत आल्याने महायुतीत तणाव निर्माण झाला आहे.

राष्ट्रवादीची तानाजी सावंतांवर टीका

तानाजी सावंत यांनी राष्ट्रवादी काँग्रेस पक्षावर टीका केली, पण टीकेच्या निमित्ताने त्यांचं दर्शन भूम-परंडा-वाशीतील जनतेला झालं, अशी खोचक टीका राष्ट्रवादी युवकचे सरचिटणीस सूरज चव्हाण यांनी केली. मात्र, तानाजी सावंत यांनी दोस्तीत कुस्ती करू नये, सावंत यानी राजकीय अज्ञान पाजळून महाराष्ट्रासमोर आपलं हसं करुन घेऊ नये, असेही सूरज सावंत यांनी म्हटलं.