Ladki Bahin Yojana : लाडकी बहीण योजनेमुळं निधीला थोडा उशीर झाला, भरणेंचं वक्तव्य, भुजबळांची पाठराखण; अजित पवार म्हणाले, कोणत्या अपेक्षेनं ते...
Ladki Bahin Yojana : मुख्यमंत्री माझी लाडकी बहीण योजनेमुळं निधी मिळायला उशीर होत होता, असं वक्तव्य मंत्री दत्तात्रय भरणे यांनी केलं आहे.
पुणे / नाशिक : मुख्यमंत्री माझी लाडकी बहीण योजना महायुतीला पुन्हा सत्तेत आणण्यासाठी महत्त्वाची ठरली आहे. लाडकी बहीण योजनेच्या 12 हप्त्यांची रक्कम लाडक्या बहिणींच्या खात्यात जमा करण्यात आली आहे. जून महिन्याच्या हप्त्याची रक्कम काहीच दिवसांपूर्वी लाडक्या बहिणींच्या खात्यात जमा करण्यात आली आहे. लाडकी बहीण योजनेसाठी सामाजिक न्याय विभाग आणि आदिवासी विकास विभागातून यापूर्वी निधी वर्ग करण्यात आल्यानं वाद निर्माण झाला होता. आता महायुती सरकारमधील मंत्री दत्तात्रय भरणे यांनी लाडकी बहीण योजनेमुळं निधी यायला उशीर होतोय, असं म्हटलं आहे. दुसरे मंत्री छगन भुजबळ यांनी देखील दत्तात्रय भरणे यांनी वक्तव्य केलं त्यात लपवण्यासारखं काय आहे, असं म्हटलं. उपमुख्यमंत्री आणि वित्तमंत्री अजित पवार यांनी दत्तात्रय भरणे यांच्या अपेक्षा काय आहेत, याची माहिती घेणार असल्याचं म्हटलं.
दत्तात्रय भरणे काय म्हणाले?
दत्तात्रय भरणे यांनी काल एका कार्यक्रमात बोलताना म्हटलं की, मी इंदापूर तालुक्याल सर्व विभागातून जास्त निधी आणण्याचा प्रयत्न करत असतो. आज लाडक्या बहिणीमुळे निधी यायला थोडा उशीर होतोय. थोडा उशीर झाला पण गाडी हळूहळू पूर्ववत यायला लागली आहे.
छगन भुजबळ काय म्हणाले?
राष्ट्रवादी काँग्रेसचे ज्येष्ठ नेते छगन भुजबळ यांना दत्तात्रय भरणे यांच्या वक्तव्यासंदर्भात विचारण्यात आलं. यासंदर्भात बोलताना छगन भुजबळ यांनी यात लपवण्यासारखे काही नाही, स्वाभाविक आहे. घरी अचानक एक मोठा खर्च निघाला तर काय स्थिती होते. लाडकी बहीण योजनेसाठी 45000 कोटी बाजूला काढायचे आहेत. त्यामुळे इतर गोष्टींना ताण सहन करावा लागेल. शंभर टक्के मलाही वाटते आणि कोणालाही वाटणार,असंही छगन भुजबळ म्हणाले. सरकारकडे लाडक्या बहिणींसाठी शिल्लक निधी पडलेला नव्हता. जोपर्यंत नीट घडी बसत नाही तोपर्यंत हे होणार आहे. सरकार पुन्हा पूर्ववत घडी कशी बसणार यासाठी प्रयत्न करत आहे. लाडकी बहीण, शिव भोजन थाळी याच्या पैशांना देखील उशीर होत आहे. पैसे कुठेही जाणार नाही सर्वांना ते पैसे मिळणार आहेत. पहिले कशाला प्राधान्य द्यायचं हे सरकारने ठरवायचे असते, असं छगन भुजबळ म्हणाले.
राज्याचे उपमुख्यमंत्री आणि वित्तमंत्री अजित पवार यांनी देखील दत्तात्रय भरणे यांच्या वक्तव्यावर प्रतिक्रिया दिली आहे. अजित पवार यांनी मी विचारतो त्याला, त्याच्याकडे कुठली बातमी कळाली, शेवटी तो माझा सहकारी आहे. मंत्री महोदय आहेत, त्यांना विचारुन क्लिअर करतो, कुठल्या अपेक्षेनं, कुठल्या हेतूनं ते बोलले आहेत, असं म्हटलं.
महत्त्वाच्या बातम्या
