Aurangabad News : सुशील मोदींनी भाजपचे खरे दात दाखवले : अंबादास दानवे

Aurangabad News : "धोका दिला म्हणून भाजपने शिवसेना फोडली," असं वक्तव्य भाजपचे ज्येष्ठ नेते आणि राज्यसभा खासदार सुशील कुमार मोदी यांनी बिहारमध्ये केलं होतं. त्यावर अंबादास दानवे यांनी ही प्रतिक्रिया दिली.

Ambadas Danve

Aurangabad News : "सुशील मोदी (Sushil Kumar Modi) यांनी आता भाजपचे (BJP) खरे दात दाखवले आहेत. राज्यात जे घडलं ते भाजपने केलं आणि आता मोदी बोलले तेव्हा सत्य बाहेर आलं," अशी टीका शिवसेनेचे नेते आणि विधानपरिषदेचे विरोधी पक्षनेते अंबादास दानवे (Ambadas Danve) यांनी केली. "धोका दिला म्हणून भाजपने शिवसेना फोडली," असं वक्तव्य भाजपचे ज्येष्ठ नेते आणि राज्यसभा खासदार सुशील कुमार मोदी यांनी बिहारमध्ये केलं होतं. त्यावर अंबादास दानवे यांनी ही प्रतिक्रिया दिली.

सुशील कुमार मोदी काय म्हणाले होते?
बिहारचे मुख्यमंत्री नितीश कुमार, जेडीयूचे राष्ट्रीय अध्यक्ष ललन सिंह यांनी भाजपवर अनेक आरोप करत एनडीएतून बाहेर पडण्याचा निर्णय घेतला. या गोष्टीचा धागा पकडत सुशील मोदी यांनी महाराष्ट्र आणि शिवसेनेचं उदाहरण दिलं. त्यांनी म्हटलं होतं की, "आम्ही कोणताही मित्रपक्ष तोडत नाही. ज्यांनी आमचा विश्वासघात केला त्यांना आम्ही तोडले आहे. जसे महाराष्ट्र. महाराष्ट्रात शिवसेनेने आमचा विश्वासघात केला आणि त्याचे परिणाम भोगावे लागले."

राज्यातील उठाव नव्हता, गद्दांराचा प्लॅन होता : अंबादास दानवे 
यावर सुशील कुमार मोदी यांच्या या वक्तव्यावर अंबादास दानवे यांनी टीका करताना भाजपने खरे दात दाखवल्याचं म्हटलं. दानवे म्हणाले की, "राज्यात जे घडलं ते भाजपने केलं आणि आता मोदी बोलले तेव्हा सत्य बाहेर आलं. त्यांनी अनेक पक्षांसोबत त्यांनी असंच केलं. त्यामुळे राज्यातील उठाव नव्हता तर हा सगळा गद्दार लोकांचा प्लॅन होता. आता ईडीचे कार्यलय बिहारमध्ये शिफ्ट होईल."

शरद पवारांचाही भाजपवर निशाणा
भाजपच्या अध्यक्षांनी असं वक्तव्य केलं की प्रादेशिक पक्षांना भवितव्य नाही, ते शिल्लक राहणार नाहीत आणि आमचा एकच भाजप हा पक्ष देशामध्ये शिल्लक राहिल. नितीश कुमारांची तक्रार आहे तीच तक्रार ही अकाली दलाची आणि इतर मित्र पक्षांची आहे. भाजप त्यांच्यासोबत असलेल्या मित्र पक्षाला हळूहळू संपवतात. शिवसेना भाजप एकत्र होते. शिवसेनेत दुरी कशी करता येईल अशी परिस्थिती निर्माण केली आणि शिवसेनेच्या मित्रपक्षाने सेनेवर आघात केला.  नितीशकुमार हे लोकांच्यात मान्यता असलेला नेताच आहे. निवडणुकीत भाजप एकत्र येतात आणि मित्र पक्षातील लोकांच्या जागा कशा कमी येतील याची काळजी घेतात. नितीशकुमार वेळीच सावध झाले. त्यांनी तातडीने राजीनामा दिला. आज भाजपचे नेते त्यांच्यावर टीकाटिप्पणी करतात करतात. परंतु नितीश कुमारांनी टाकलेलं पाऊल शहाणपणाचं आहे.