Ajit Pawar broke traffic rules : उपमुख्यमंत्र्यांनीच तोडले वाहतुकीचे नियम, पुण्यात अजितदादांचा ताफा उलट्या दिशेने सुसाट
Ajit Pawar brake traffic rules in, Pune : उपमुख्यमंत्री अजित पवार (Ajit Pawar) यांच्या ताफ्यानेच पुण्यात वाहतुकीचे नियम मोडले आहेत. एकीकडे लोकांची वाहने सिग्नलजवळ थांबलेली असता अजित पवारांचा ताफा मात्र, उलट्या दिशेने जाताना दिसत होता.
Ajit Pawar broke traffic rules in, Pune : उपमुख्यमंत्री अजित पवार (Ajit Pawar) यांच्या ताफ्यानेच पुण्यात वाहतुकीचे नियम मोडले आहेत. एकीकडे लोकांची वाहने सिग्नलजवळ थांबलेली असता अजित पवारांचा ताफा मात्र, उलट्या दिशेने जाताना दिसत होता. त्यामुळे अधिकाऱ्यांना नेहमीच नियमांना वागण्यासाठी सज्जड दम देणाऱ्या अजित पवारांनाच वाहतुकीच्या नियमांचा (traffic rules) विसर पडलाय. अजित पवार पुण्यात महायुतीचे उमेदवार मुरलीधर मोहोळ (Muralidhar Mohol) यांचा उमेदवारी अर्ज भरण्यासाठी आले होते. तेव्हा हा प्रकार घडला आहे.
नेमकं काय घडलं?
उपमुख्यमंत्री अजित पवार पुण्याचे महायुतीचे उमेदवार मुरलीधर मोहोळ आणि शिरुरचे महायुतीचे उमेदवार शिवाजीराव आढळराव पाटील यांचा उमेदवारी अर्ज भरण्यासाठी पुण्यात दाखल झाले होते. पवार उमेदवारी अर्ज भरण्यासाठी आज (दि.25) जिल्हाधिकारी कार्यालय येथे अजित पवार आले होते. यावेळी काही वेळ ते जिल्हाधिकारी कार्यालयात थांबून पुन्हा बाहेर आले व निघताना त्यांचा गाड्यांचा ताफा हा उलट्या दिशेने गेला. आश्चर्य म्हणजे पोलिसांनी देखील त्यांना अडवले नाही. इतर वाहने थांबलेली असतानाही उपमुख्यमंत्र्यांचा ताफा मात्र, सुसाट निघाला होता.
पुण्यात तिरंगी लढत
पुणे लोकसभा मतदारसंघात तिरंगी लढत पाहायला मिळत आहे. काँग्रेस पक्षाने आमदार रवींद्र धंगेकर यांना मैदानात उतरवले आहे. तर भाजपने पुण्याचे माजी महापौर मुरलीधर मोहोळ यांना धंगेकरांविरोधात उमेदवारी दिली आहे. तर नुकतेच मनसेमधून बाहेर पडलेले वसंत मोरेही निवडणुकीच्या रिंगणात उतरले आहेत. त्यांना प्रकाश आंबेडकरांच्या वंचित बहुजन आघाडीने उमेदवारी दिली आहे. त्यामुळे पुण्यात तिरंगी लढत पाहायला मिळणार आहे.
शिरुरमध्ये दोन्ही राष्ट्रवादीमध्ये लढाई
शिरुर लोकसभा मतदारसंघात अजित पवारांची राष्ट्रवादी आणि शरद पवारांची राष्ट्रवादी आमने-सामने आहे. कारण शरद पवारांनी विद्यमान खासदार अमोल कोल्हे यांना उमेदवारी दिली आहे. तर अजित पवारांनी शिंदे गटातून आयात केलेल्या शिवाजी आढळराव पाटलांना निवडणुकीच्या रिंगणात उतरवले आहे. त्यामुळे शिरुर लोकसभा मतदारसंघात अजित पवार आणि शरद पवारांची राष्ट्रवादी आमने-सामने आली आहे. अजित पवार आणि शरद पवारांची राष्ट्रवादी 2 मतदारसंघात आमने-सामने आली आहे. शिरुर, बारामतीमध्ये काका-पुतण्याची प्रतिष्ठा पणाला लागली आहे. शिवाय, शरद पवारांकडून बारामतीमध्ये लेकीसाठी अनेक वर्षांपासून विरोधक असलेल्या नेत्यांच्या भेटीगाठी घेतल्या जात आहेत.
इतर महत्वाच्या बातम्या
महत्त्वाच्या बातम्या
