परभणीत स्विमिंग पूलमध्ये बुडुन 55 वर्षीय व्यक्तीचा मृत्यू; 3 तासानंतर मृतदेह शोधण्यास यश

महानगरपालिकेने ही जलतरणीका खासगी तत्वावर चालवण्यास दिली आहे, काही वर्षांपूर्वी असाच एका तरुणाचा मृत्यू येथे झाला होता.

Parbhani swimming pool drowned

Source : abp

परभणी : शहरातील एका जलतरणीकेत (Swimming pool) बुडून 55 वर्षीय व्यक्तीचा मृत्यू झाल्याची घटना आज परभणीत घडली आहे. शहरातील मोहमदिया मशीद परिसरात राहणारे असलम खान हे दररोजच्या प्रमाणे आपल्या मित्रांसमवेत जलतरणीकेत पोहण्यासाठी आले होते. मात्र, काही वेळाने ते दिसेनासे झाले, त्यामुळे मित्रांनी त्यांना शोधायला सुरुवात केली तब्बल 3 तास जलतरणीकेतील कर्मचाऱ्यांनी शोधल्यानंतर त्यांचा मृतदेह पाण्यातून बाहेर काढण्यात आला. दरम्यान परभणी (Parbhani) महानगरपालिकेने ही जलतरणीका खासगी तत्वावर चालवण्यास दिली आहे, काही वर्षांपूर्वी असाच एका तरुणाचा मृत्यू येथे झाला होता. त्यानंतर पुन्हा एकदा तशीच घटना घडल्याने येथे पोहण्यासाठी, सरावासाठी येणाऱ्यांच्या सुरक्षेचा प्रश्न ऐरणीवर आला आहे. 

उन्हाळा सुरू असल्याने सध्या नदी, तलाव, स्विमिंग पूल आणि इतर ठिकाणी पोहोण्यासाठी नागरिक गर्दी करताना दिसून येतात. मात्र, सुरक्षेच्या अभावाशिवाय पोहण्यास उतरणे जीवावर बेतू शकते. विशेष म्हणजे महापालिकेच्या जलतरणीकेतून बुडून एका व्यक्तीचा मृत्यू झाल्याने तेथील सुरक्षेवर प्रश्न निर्माण झाले आहे. पाण्यात उतरणाऱ्या व्यक्तींना सेफ जॅकेट का दिले जात नाही, त्यांच्या सुरक्षेसाठी सेफ गार्ड जलतरण परिसरात का नव्हते, असे प्रश्न उपस्थित होत आहेत. त्यामुळे, जलतरणीकेचा ठेका घेतलेल्या संबंधित ठेकेदारावर कारवाई होणार का याकडे सर्वांचे लक्ष लागले आहे.  

हेही वाचा