Boisar MIDC Accident : बोईसरच्या भगेरिया केमिकल्समधील ओलियम गॅस गळतीवर नियंत्रण; NDRF दाखल, सुदैवाने जीवितहानी टळली

Boisar MIDC Accident Update: तब्बल चार तासांच्या प्रयत्नानंतर अग्निशमन दलाला लिकेजवर नियंत्रण मिळवण्यात यश आलं. या घटनेनंतर तारापूर MIDC मधील सुरक्षा व्यवस्थेबाबत पुन्हा प्रश्नचिन्ह उपस्थित झाले आहेत.

Boisar Tarapur MIDC (File Photo)

Source : abp majha

Boisar Tarapur MIDC : पालघर जिल्ह्यातील बोईसर तारापूर एमआयडीसी परिसरातील भगेरिया केमिकल्स कंपनीत ओलियम वायूची गॅस गळती झाल्याने परिसरात मोठी खळबळ उडाली. सोमवारी दुपारी दोन ते सव्वादोनच्या सुमारास ओलियम साठवण टँकमधून गळती सुरू झाली. तब्बल चार तासांच्या प्रयत्नानंतर अग्निशमन दलाला लिकेजवर काही प्रमाणात नियंत्रण मिळवण्यात यश आले आहे. सुदैवाने या घटनेत जीवितहानी झालेली नसल्याची माहिती प्रशासनाने दिली आहे.

Industrial Gas Leak Incident : आगीनंतर गॅस गळती, कामगारांची पळापळ

एमआयडीसीतील भगरिया केमिकल्स कंपनीत आधी आगीची घटना घडली आणि त्यानंतर ओलियम वायूची गळती सुरू झाली. वाऱ्याची दिशा पश्चिमेकडून पूर्वेकडे असल्याने सल्फर डायऑक्साइड आणि इतर सल्फर ऑक्साइडची निर्मिती होऊन त्याचा परिणाम परिसरातील कामगार आणि नागरिकांवर झाला. अनेकांना डोळ्यांत जळजळ, घशात खवखव आणि श्वसनाचा त्रास जाणवू लागल्याने परिसरात भीतीचे वातावरण निर्माण झाले.

Oleum Gas Effect : 1 ते 1.5 किमी परिसर बाधित

प्राथमिक माहितीनुसार, गॅसचा परिणाम सुमारे एक ते दीड किलोमीटर परिसरात जाणवला. ओलियम वायू हवेच्या संपर्कात आल्यावर सल्फर डायऑक्साइड तयार होत असल्याने डोळे लाल होणे, चुरचुरणे, घसा कोरडा पडणे असे लक्षणे दिसून आली. 

NDRF and Fire Brigade Action : चार तासांनंतर नियंत्रण

अग्निशमन दलाने तत्काळ घटनास्थळी धाव घेत गॅस लिकेजवर नियंत्रण मिळवण्याचे प्रयत्न सुरू केले. सुमारे चार तासांच्या अथक प्रयत्नांनंतर टँकमधील गळतीचे प्रमाण कमी करण्यात यश आले. एनडीआरएफची टीमही घटनास्थळी दाखल झाली असून परिस्थितीवर लक्ष ठेवून आहे. औद्योगिक सुरक्षा व आरोग्य संचालनालयाच्या अधिकाऱ्यांनी सुमारे एक टन ओलियम गळतीचा प्राथमिक अंदाज व्यक्त केला आहे.

Safety Measures Taken : शाळा बंद, कामगारांना सुरक्षितस्थळी हलवले

टाकी नाका परिसरातील तारापूर विद्यामंदिर शाळेतील विद्यार्थ्यांना सुरक्षिततेच्या कारणास्तव घरी सोडण्यात आले. तसेच आसपासच्या उद्योगांतील कामगारांना सुरक्षित ठिकाणी हलवण्याच्या सूचना देण्यात आल्या. पालघरचे पोलीस अधीक्षक यतीस देशमुख घटनास्थळी दाखल झाले असून परिस्थितीनुसार पुढील निर्णय घेतले जातील, असे त्यांनी सांगितले.

Repeated MIDC Incidents : यापूर्वीही अशाच घटना

विशेष म्हणजे काही महिन्यांपूर्वी एमआयडीसीच्या शिवाजीनगर भागात सल्फ्युरिक अॅसिड आणि ओलियमची गळती होऊन परिसर बाधित झाला होता. त्यामुळे बोईसर तारापूर एमआयडीसीतील सुरक्षा व्यवस्थेबाबत पुन्हा प्रश्नचिन्ह उपस्थित झाले आहे.

सध्या परिस्थिती नियंत्रणात असल्याचे प्रशासनाने सांगितले असून नागरिकांनी अफवांवर विश्वास न ठेवता अधिकृत सूचनांचे पालन करावे, असे आवाहन करण्यात आले आहे.

ही बातमी वाचा: