Nashik : नाशिकमधील शाळांमध्ये मराठी भाषा सक्तीची, अन्यथा पाच लाख दंड, शिक्षण उपसंचालकांच्या सूचना
प्रत्येक शाळांत मराठी भाषा सक्तीची असून कायद्यानुसार मराठी भाषेत शिक्षण देण्यासाठी सर्वांनी आग्रही असणे आवश्यक आहे. अन्यथा 5 लाख दंड करण्यात येईल.
नाशिक : राज्यातील शाळा काही दिवसांत सुरु होत असून याबाबतच्या नियोजनासंदर्भात आज नाशिक जिल्ह्यातील मुख्याध्यापक, प्राचार्यांची बैठक घेण्यात आली. यावेळी शाळा सुरु झाल्यानंतर व सुरु होण्यापूर्वी काय काय उपाययोजना कराव्यात या संदर्भात सूचना करण्यात आल्या आहेत.
येत्या काही दिवसांत शाळा सुरु होणार असल्याने शाळांवरील मुख्याध्याप आणि प्राचार्य यांच्यासाठी शाळांचे व्यवस्थापन कसे असावे, तसेच शाळा सुरु करण्यापूर्वी शाळांमध्ये काय काय सुविधा असाव्यात याबाबत मार्गदर्शक सूचना करण्यात आल्या. नाशिक जिल्हा प्रशासनाच्या माध्यमातून गंगापूर रोड येथील रावसाहेब थोरात येथे हि बैठक आयोजित करण्यात आली होती.
दरम्यान यावेळी शिक्षण उपसंचालकांनी मार्गदर्शक सूचना सांगितल्या. यामध्ये पहिल्या दिवशी मुलांचे स्वागत शाळेत पुस्तक आणि गुलाब पुष्प देऊन करण्यात येईल. मात्र पाऊस सुरु झाला असून नव्याने येणाऱ्या बालकांसहित इतर बालकांना पुस्तके वाटप करण्यात येणार आहेत. हि पुस्तके पावसापासून सांभाळण्याचे आवाहन त्यांनी केले. तसेच पाऊस सुरु होणार असल्याने शाळांमध्ये वृक्षारोपण करण्यात यावेत, शाळा सुरु करण्यापूर्वी बिंदू नामावली तपासुन घ्या, त्याचबरोबर शाळांचे ऑडिट वेळेवर करा, तसेच डिजी लाॅकर अँप डाऊनलोड करून मार्कशिटसह विद्यार्थ्यांचे आधार कार्ड अपडेट करून अपलोड करण्यास सांगण्यात आले आहे.
त्याचबरोबर जिल्ह्यातील प्रत्येक शाळेत तक्रार पेटी लावणे आवश्यक असून यासाठी शाळेतील शिक्षकांनी वेळोवेळी पाठपुरावा करणे आवश्यक आहे. तसेच दहावी हे विद्यार्थ्यांचे महत्वाचे वर्ष असते, त्यामुळे १० वी च्या वर्गांवर मुख्यध्यापकांनी जाणे बंधनकारक आहे. तसेच सर्व शाळांतील मुलींना केंद्रस्थानी ठेवून सुरक्षिततेसाठी विशाखा समिती स्थापन करण्यात यावी.
विशेष म्हणजे मुलांच्या सुरक्षिततेसाठी वर्गामध्ये सिसिटिव्ही आवश्यक असून त्यासाठी वेळोवेळी पाठपुरावा करण्यात यावा. त्याचबरोबर वेळोवेळी शिक्षकांची मिटिंग घेणे. बहुविकलांग विद्यार्थ्यांसाठी सुविधा करणे, विविध शिबिरांमध्ये सहभागी करणे. संकलित मुल्यमापन तपासणे. शाळेत विविध परिसंवाद आयोजित करणे. विविध स्पर्धा परिक्षांना विद्यार्थ्यांना बसविणे आदी सूचना या बैठकित करण्यात आल्या आहेत.
मराठी भाषा सक्तीची
प्रत्येक शाळांत मराठी भाषा सक्तीची असून कायद्यानुसार मराठी भाषेत शिक्षण देण्यासाठी सर्वांनी आग्रही असणे आवश्यक आहे. अन्यथा 5 लाख दंड करण्यात येईल अशा सक्तीच्या सूचना देण्यात आल्या आहेत.
शाळेतील प्रकरणे शाळेतच मिटवणे
अनेकदा शाळांमध्ये किरकोळ कारणांवरून वाद होतात. हे वाद स्थानिक पातळीवर शिक्षकांनी तसेच मुख्याध्यापकांनी मिटवावेत. ही प्रकरणे कोर्टात जाणार नाही याकडे लक्ष ठेवणे गरजेचे आहे. तसेच प्रत्येक विषयाला वेगळे शिक्षक नेमावेत अशा कडक सूचना देण्यात आल्या आहेत.
महत्त्वाच्या बातम्या
