Nashik Lok Sabha : भुजबळांच्या माघारीनंतरही महायुतीत नाशिकचा गुंता सुटेनाच, शिवसेना-राष्ट्रवादीच्या वादात भाजपची पुन्हा उडी

Nashik Lok Sabha Constituency : नाशिक लोकसभा मतदारसंघाचा महायुतीचा तिढा अजूनही कायम आहे. आता शिवसेना आणि राष्ट्रवादी काँग्रेसच्या वादात पुन्हा एकदा भाजपने उडी घेतली आहे.

Ajit Pawar, Eknath Shinde and Devendra Fadnavis

Source : PTI

Nashik Lok Sabha Constituency : एकीकडे नाशिक लोकसभा मतदारसंघात शिवसेना ठाकरे गटाने (Shiv Sena UBT) सिन्नरचे माजी आमदार राजाभाऊ वाजे (Rajabhau Waje) यांनी उमेदवारी घोषित करून तीन आठवड्यांचा कालावधी लोटला आहे. तर दुसरीकडे महायुतीच्या जागा वाटपात (Mahayuti Seat Sharing) नाशिकचा तिढा अजूनही कायम आहे. 

महायुतीत शिवसेना शिंदे गटाचे विद्यमान खासदार हेमंत गोडसे (Hemant Godse) हे पुन्हा एकदा उमेदवारी मिळण्यासाठी प्रयत्न करत आहेत. तर राष्ट्रवादी अजित पवार गटाकडून मंत्री छगन भुजबळ (Chhagan Bhujbal) हे नाशिकच्या जागेसाठी आग्रही होते. मात्र त्यांनी काही दिवसांपूर्वीच पत्रकार परिषद घेत नाशिक लोकसभेतून (Nashik Lok Sabha Constituency) निवडणूक लढण्यास माघार घेतली. तसेच या मतदारसंघ भाजपला मिळावा, अशी मागणी भाजपच्या (BJP) पदाधिकाऱ्यांनी याआधी केली होती. 

शिवसेना-राष्ट्रवादीच्या वादात पुन्हा एकदा भाजपची उडी

छगन भुजबळ यांच्या माघारीच्या घोषणेनंतरही नाशिक लोकसभा मतदारसंघाचा महायुतीचा तिढा अजूनही कायम असल्याचे चित्र आहे. आता शिवसेना (Shiv Sena) आणि राष्ट्रवादी काँग्रेसच्या (NCP) वादात पुन्हा एकदा भाजपने उडी घेतली आहे. नाशिकची जागा भाजपला देण्याची मागणी वरिष्ठ पदाधिकाऱ्यांकडे करण्यात आली आहे. 

महायुतीत नाशिकचा तिढा सुटेना, मविआची प्रचारात आघाडी

नाशिक लोकसभा मतदारसंघात भाजपचे तीन आमदार आहेत. नाशिक, त्रंबकेश्वर स्थानिक स्वराज्य संस्थामध्ये भाजपची अधिक ताकद असल्याने ही जागा भाजपलाच सुटावी, अशी मागणी नाशिकच्या भाजप पदाधिकाऱ्यांनी केली आहे. पुढील चार दिवसांत उमेदवारी अर्ज भरण्यास सुरुवात होणार आहे. नाशिकचा तिढा सत्ताधारी घटक पक्षांना सोडवता येत नसल्यानं मविआची प्रचारात आघाडी घेतल्याचे चित्र आहे.

हेमंत गोडसेंना पक्षातूनच आव्हान

दरम्यान, नाशिक लोकसभेसाठी खासदार हेमंत गोडसे हे इच्छुक असतानाच त्यांना त्यांच्याच पक्षातून आव्हान निर्माण झाले आहे. शिंदे गटाचे नाशिक जिल्हाप्रमुख अजय बोरस्ते यांनी मुख्यमंत्री एकनाथ शिंदे यांची भेट घेत नाशिक लोकसभेतून निवडणूक लढवण्याची तयारी दर्शवली आहे. त्यामुळे आता शिंदे गटात दोन गट पडल्याचे चित्र आहे. नाशिकची जागा शिवसेनेला मिळाल्यास मुख्यमंत्री एकनाथ शिंदे हे हेमंत गोडसे की अजय बोरस्ते? कुणाला पसंती देणार हे पाहणे महत्वाचे ठरणार आहे. 

इतर महत्वाच्या बातम्या