Nashik : नाशिकमध्ये खासगी डॉक्टरवर प्राणघातक हल्ला, हॉस्पिटलच्या ICU मध्ये केले वार, हल्लेखोर फरार

Nashik Crime : पंचवटी परिसरातील सुयोग हॉस्पिटलमध्ये रात्रीच्या वेळेस ही घटना घडली आहे.

Maharashtra Nashik Crime marathi news

Nashik Crime : नाशिकमध्ये एक धक्कादायक प्रकार घडला आहे. शुक्रवारच्या मध्यरात्री येथे एका खासगी डॉक्टरवर प्राणघातक हल्ला झाला आहे, पंचवटी परिसरातील सुयोग हॉस्पिटलमध्ये (Suyog Hospital) रात्रीच्या वेळेस ही घटना घडली आहे. हॉस्पिटल मधील अतिदक्षता विभागातच डॉक्टर कैलास राठी यांच्यावर धारदार शस्त्राने वार करण्यात आले. या हल्ल्याचे कारण अस्पष्ट असून हल्लेखोर मात्र फरार आहे. घटनेची माहिती समजताच पंचवटी पोलिस घटनास्थळी दाखल झाले आहेत.

 

डॉक्टरांची प्रकृती चिंताजनक, उपचार सुरू

नाशिक पोलिसांनी दिलेली सविस्तर माहिती अशी की, सुयोग हॉस्पिटलमध्ये अज्ञात व्यक्तीने हॉस्पिटलचे संचालक डॉ. कैलास राठी यांच्यावर धारदार शस्त्राने वार करीत हल्ला केला. ही घटना शुक्रवारी रात्री घडली. डॉ. राठी हॉस्पिटलमध्ये असताना एक व्यक्ती त्यांना भेटण्यासाठी आला, त्यावेळी डॉ. राठी आणि त्या व्यक्तीमध्ये यांच्यात बोलणे झाले. काही वेळाने पुन्हा दुसऱ्या कॅबिनमध्ये दोघेही चर्चा करण्यासाठी गेले असता, त्या दोघांमध्ये पुन्हा वाद झाला, त्यावेळी त्या व्यक्तीने कॅबिनची कडी लावून धारदार कोयता काढून डॉ. राठी यांच्या डोक्यावर तसेच मानेवर वार केले. अज्ञात हल्लेखोराने केलेल्या हल्ल्यात डॉक्टर राठी गंभीर जखमी झाल्याने प्रकृती चिंताजनक असून त्यांव्यावर उपचार सुरू आहे. 

 

डॉक्टर-पेशंट असा वाद नाही - नाशिक पोलीस आयुक्त

सुयोग हॉस्पीटलमधील डॉक्टरवरील हा हल्ला खाजगी कारणातून झाला आहे. मात्र डॉक्टर-पेशंट असा वाद नाही असं नाशिकचे पोलीस आयुक्त संदीप कर्णिक यांनी सांगितलंय

 

 

नाशिकमध्ये डॉक्टरांवरील हल्ल्यात वाढ

यापूर्वी 2022 मध्ये सुद्धा अशा प्रकारची घटना समोर आली होती. नाशिकमध्येप्रख्यात नेत्ररोगतज्ज्ञ अशी ओळख असलेल्या डॉक्टर प्राची पवार यांच्यावर प्राणघातक हल्ला झाल्याने एकच खळबळ उडाली होती. डॉक्टर प्राची पवार यांच्या हल्ल्याची घटना ताजी असतानाच आणखी एका महिला डॉक्टरवर हल्ल्याची धक्कादायक घटना नाशिक शहरात घडली होती. एकाच हॉस्पिटलमध्ये काम करणाऱ्या एका वॉर्डबॉयने महिला डॉक्टरवर प्राणघातक हल्ला केला होता, ज्यात महिला डॉक्टर गंभीर जखमी झाली होती. या प्रकरणी गंगापूर पोलिसांकडून वॉर्डबॉय अनिकेत डोंगरेला अटक करण्यात आली होती. 

 

 

हेही वाचा>>>