रस्त्याच्या कडेला उभे राहून मैत्रीणीची वाट पाहणाऱ्या अल्पवयीन मुलीचं अपहरण करुन बलात्कार

रस्त्याच्या कडेला उभे राहून मैत्रिणीची वाट पाहणाऱ्या 15 वर्षीय मुलीचे अपहरण करून तिच्यावर दोघांनी बलात्कार केल्याची घटना नागपूरात घडली आहे. पोलिसांनी या प्रकरणी दोन्ही आरोपीना अटक केली आहे.

सांकेतिक छायाचित्र

नागपूर : रस्त्याच्या कडेला उभे राहून मैत्रीणीची वाट पाहणाऱ्या 15 वर्षीय मुलीचे अपहरण करून तिच्यावर दोघांनी बलात्कार केल्याची घटना नागपूरात घडली आहे. पोलिसांनी या प्रकरणी दोन्ही आरोपीना अटक केली आहे. पीडित मुलीने कुटुंबियांच्या मदतीने काल (मंगळवारी) पोलीस स्टेशन गाठल्यानंतर 12 नोव्हेंबर रोजी घडलेली ही घटना उघडकीस आली.

12 नोव्हेंबरला पीडित मुलगी मार्टिननगर भागात आपल्या मैत्रीणीची वाट पाहत उभी होती. शमशाद अन्सारी आणि बबलू कटवते हे दोन्ही आरोपी एकट्या मुलीवर नजर ठेवून होते. बराच वेळ मैत्रीण आली नसल्यामुळे मुलगी घराकडे जाण्यासाठी निघाली असता दोघांनी तिला गाठून बळजबरीने बाईकवर बसवून गोरेवाडाच्या जंगलात नेले आणि तिच्यावर बलात्कार केला. घटनेनंतर दोघांनी पीडितेला तिच्या घराच्या परिसरात सोडून पळ काढला. घटनेनंतर घाबरलेल्या मुलीने स्वतःला खोलीत कोंडून घेत जेवण बंद केले होते.

तिची मानसिक अवस्था तिच्या आईच्या लक्षात आली. तिने मुलीला विश्वासात घेत विचारणा केली असता पीडित मुलीने 12 नोव्हेंबरला तिच्या सोबत घडलेला प्रसंग आईला सांगितला. घटना ऐकताच कुटुंबियांच्या पायाखालची वाळू सरकली. बराच विचार करून त्यांनी जरीपटका पोलीस स्टेशन गाठले. पोलिसांनी मुलीची विचारपूस करत आरोपींची माहिती घेतली. मुलीची वैद्यकीय चाचणी करवून घेतली आणि अपहरण व सामूहिक बलात्काराचा गुन्हा दाखल केला आहे. सीसीटीव्ही फुटेज तपासून गुन्ह्याची शहानिशा करत पोलिसांनी दोन्ही आरोपीना अटक केली आहे. दोन्ही आरोपी सज्ञान असून दोघांचे वय 22 वर्ष आहे.

Beed acid attack | स्पेशल रिपोर्ट | बीडमध्ये प्रियकराने अ‍ॅसिड टाकलेल्या तरुणीचा मृत्यू, घटनाक्रम..