मुख्यमंत्र्यांनी उद्धव ठाकरेंची घेतली भेट, मंत्रिमंडळ विस्ताराबाबत चर्चा

येत्या सोमवारपासून राज्याचं पावसाळी अधिवेशन सुरु होत आहे. मात्र काँग्रेस-राष्ट्रवादीतून आयात नेत्यांना प्राधान्य मिळत असल्याने दोन्ही पक्षांत अंतर्गत कलह सुरु झाल्याचं बोललं जातं आहे, त्यामुळे मंत्रिमंडळ विस्तार लांबला आहे.

मुंबई : मुख्यमंत्री देवेंद्र फडणवीस यांनी काल (शुक्रवारी) शिवसेना पक्षप्रमुख उद्धव ठाकरे यांची भेट घेतली. काल उशिरा रात्री ही भेट झाल्याची माहिती स्वत: मुख्यमंत्र्य़ांनी ट्विटरवरुन दिली. या बैठकीत मंत्रिमंडळ विस्ताराबाबत उद्धव ठाकरेंशी विस्तृत चर्चा झाल्याचं मुख्यमंत्री फडणवीसांनी म्हटलं आहे.

शिवसेना पक्ष प्रमुख मा. उद्धव ठाकरेजी यांची आज मातोश्री येथे भेट घेतली आणि मंत्रिमंडळ विस्तारासंदर्भात विस्तृत चर्चा केली.

— Devendra Fadnavis (@Dev_Fadnavis) June 14, 2019

पावसाळी अधिवेशना आधी मंत्रिमंडळ विस्तार होईल असा अंदाज व्यक्त जात होता. येत्या सोमवारपासून राज्याचं पावसाळी अधिवेशन सुरु होत आहे. रविवारी नव्या मंत्र्यांचा शपथविधी होईल आणि नवनिर्वाचित मंत्री मंत्रिमंडळ बैठकीत सहभागी होतील, असा अंदाज व्यक्त केला जात होता.मात्र काँग्रेस-राष्ट्रवादीतून आयात नेत्यांना प्राधान्य मिळत असल्याने दोन्ही पक्षांत अंतर्गत कलह सुरु झाल्याचं बोललं जातं आहे, त्यामुळे मंत्रिमंडळ विस्तार लांबला आहे.

त्यामुळेच भाजप-शिवसेनेत मंत्रिपदाचे दावेदार, विभागांचं वाटप आणि शिवसेनेला उपमुख्यमंत्रिपद निश्चित होत नाही तोपर्यंत विस्तारावर निर्णय होणार नाही, अशी चर्चा सुरु आहे. या सर्व कारणांमुळे मंत्रिमंडळ विस्तार लांबणीवर पडला आहे.

शिवसेनेत अंतर्गत कलह?

एकट्या भाजपातच नाही, तर मातोश्रीच्या आदेश मानणाऱ्या शिवसेनेतही अंतर्गत कलह सुरु झाल्याची चर्चा राजकीय वर्तुळात रंगली आहे. मंत्रिमंडळ विस्तारात शिवसेनेला उपमुख्यमंत्रिपद मिळण्याची जोरदार चर्चा सुरु आहे. यासाठी शिवसेनेचे ज्येष्ठ नेते सुभाष देसाईंच्या नावाची चर्चा आहे. पण यावरुन नाराज असलेल्या आमदारांच्या एका गटाने एकनाथ शिंदेंसाठी मातोश्रीवर लॉबिंग सुरु केल्याचं दिसतं. तसंच ग्रामीण भागात लोकांमधून निवडून आलेल्या आमदारांना डावलून, मागच्या दाराने आलेल्या विधानपरिषद सदस्यांना मंत्रिपद देण्यात येत असल्याने शिवसेना आमदारांमध्ये असंतोष असल्याचं बोललं जातं आहे.